एजेन्सी । नामिबियामा आइतवारदेखि सुरु भएको आईसीसी विश्वकप प्लेअफ अन्तर्गत पहिलो खेलमा अमेरिकाले नामिबियामाथि ८२ रनको जित निकालेको छ ।
२३४ रनको विजयी लक्ष्य पछ्याएको घरेलु टोली ४१.४ ओभरमा अलआउट हुँदै १५१ रनमा समेतिएसंगै अमेरिका ८२ रनले विजयी भएको हो । जितसंगै अमेरिकाले तालिकामा २ अंक जोडेको छ ।
नामिबियाका लागि शउन फौचेले ९६ बलमा २ चौका प्रहार गर्दै ५३ रनको अर्धशतकिय पारी खेले ।
त्यस्तै, निकोल लोफ्टी इटोनले ४४ बल खेल्दै ४ चौका र १ छक्का प्रहार गर्दै ३८ रन जोड्दा कप्तान गेरार्ड इरासमसले ४२ बलमा २ चौका प्रहार गर्दै २४ रन जोडे ।
यता, पिङ्की या फ्रान्सले २१ बलमा १ छक्का मद्दतमा १५ रन बनाउँदै पेविलियन फर्किदा घरेलु टोलीका अन्य ब्याट्सम्यानले दोहोरो अंकमा रन जोड्न सकेनन् ।
नामिबियालाई सस्तैमा समेतिन अमेरिकाका लागि अली खानले ७ ओभर बलिङ गर्दै २१ रन दिएर १ मेडनसहित ३ विकेट लिँदा निसर्ग काताङकुमार पटेलले ९ ओभर बलिङ गर्दै १ मेडन राख्दै २८ रन दिएर ३ विकेट लिए ।
त्यस्तै, जसदिप सिंहले ७.४ ओभरमा ३५ रन खर्र्चिएर २ विकेट लिँदा सौरभ नत्राभाल्करले ८ ओभरमा १ मेडन राख्दै १३ रन दिएर १ विकेट लिए । गजानन्द सिंहले ४ ओभरमा १३ रन दिएर १ विकेट लिए ।
त्यसअघि टस जितेको नामिबियाले अमेरिकालाई ब्याटिङमा निम्त्याएको थियो । अमेरिकाले निर्धारित ५० ओभर बलिङ गर्ने क्रममा ९ विकेट गुमाएर २३३ रन जोडेको थियो ।
अमेरिकाका लागि गजानन्द सिंहले ६३ बल खेल्दै ५ चौका र १ छक्का प्रहार गर्दै सर्वाधिक ५३ रनको अर्धशतकिय इनिङ्स खेले ।
त्यस्तै, नोथस केन्जीजले ४३ बलमा ३ चौका र २ छक्का प्रहार गर्दै ४३ रन जोड्दा आरोन जोन्सले ५२ बलमा १ चौका र १ छक्का मद्दतमा ३६ रन जोडे ।
यता, जेसी सिंहले ६१ बलको सामना गर्दै ३ चौका र १ छक्का प्रहार गर्दै ३३ रन बनाएर पेविलियन फर्किदा सुशान्त मोदानीले ३७ बलमा १ चौका हान्दै १७ रनमा आउट भए ।
अमेरिकाका अन्य ब्याट्सम्यानले दोहोरो अंकमा रन जोड्न सकेनन् । अमेरिकाले अतिरिक्त रुपमा ८ रन जोड्यो ।
घरेलु टोली नामिबियाका लागि बिन शीकोङ्गोले १० ओभर बलिङ गर्दै १ मेडन राखेर ५९ रनमा ३ विकेट लिँदा शउन फौचेले १० ओभरमा ४६ रन दिएर ३ विकेट लिए ।
त्यस्तै, रुविन ट्रम्पेलम्यानले १० ओभर बलिङ गर्नेक्रममा ३६ रन दिएर १ मेडन राख्दै २ विकेट लिँदा पिक्की या फ्रान्सले १० ओभरमा ५४ रन खर्चिएर १ विकेट लिए ।
प्लेअफमा आईसीसी विश्वकप लिग २ मा पुच्छारमा रहेका ४ टोली नामिबिया, संयुक्त राज्य अमेरिका, युनाटेड अरब इमिरेट्स (युएई) र पपुवा न्युगिनी (पिएनजी) सहित आईसीसी विश्वकप च्यालेन्ज लिग ‘ए’ का विजेता जर्सी र ‘बी’ का विजेता क्यानडा गरि ६ टोलीको सहभागिता रहेको छ ।
लेखक
