भक्तपुर । नेपाली फुटबललाई व्यवसायिक बनाउन भन्दै कोरोना महामारीबीच आयोजना गरिएको फ्रेन्चाइज लिग नेपाल सुपर लिग (एनएसएल) को दोस्रो संस्करण आगामी वर्ष हुने भएको छ ।
अखिल नेपाल फुटबल संघ (एन्फा) सँग नेपाल स्पोर्टस् एण्ड इभेन्ट म्यानेजमेन्ट प्रालिले ८ वर्षका लागि १७ करोड २१ लाख रुपैयाँको सम्झौता गरेसँगै एनएसएल अर्को वर्ष हुने भएको हो ।
मंगलबार आयोजक नेपाल स्पोर्टस् एण्ड इभेन्ट म्यानेजमेन्ट प्रालि अध्यक्ष अश्रयता कार्की चौधरीले एक कार्यक्रमबीच एन्फा महासचिव किरण राईलाई पहिलो सिजनका लागि १ करोड ५० लाखको चेक हस्तान्तरण गरेकी हुन् ।
एन्फाले ८ वर्षभित्र सबै रकम प्राप्त गर्नेगरी आयोजकसँग सम्झौता पत्रमा हस्ताक्षर गरेको हो ।
सम्झौता भएसँगै आगामी वर्षको असोज–कात्तिकमा एनएसएलको दोस्रो संस्करण आयोजना गर्ने तयारी गरिएको एनएसएलका प्रमुख कार्यकारी अधिकृत सुदीप शर्माले भने ।
‘यो वर्ष चाहिँ प्रतियोगिता हुन सकेन । सम्झौता नै गरिसकेपछि अब कुनै रोकटोक हुँदेन होला भन्ने आशा गरेका छौं,’ उनले भने ।
खेलाडीको अक्सन प्रक्रिया पूरा गरिसकेको अवस्थामा एन्फाभित्रको आन्तिरिक राजनितिका कारण अन्योलमा रहेको एनएसएल प्रतियोगिता गएको असोज २३ गतेबाट गर्ने तयारी भए पनि ‘ए’ डिभिजन क्लबहरुले विरोध गर्दा हुन सकेन ।
पहिलो संस्करणको प्रतियोगितामा ७ टिमको सहभागिता थियो । दोस्रो संस्करणमा ३ क्लब थप हुने भएको छ ।
लेखक
