भक्तपुर । निर्धारित ९० र अतिरिक्त थपिएको ३० मिनेटको समयमा २–२ गोलको बराबरीमा सकिएसंगै ट्राइबे्रकरमा नेडरल्याण्डमाथि ४–३ को जित हात पार्दै अर्जेन्टिना फिफा विश्वकपको सेमिफाइनल प्रवेश गरेको छ ।
शुक्रवार राति भएको दोस्रो क्वाटरफाइनल खेल अर्जेन्टिनाका लागि कप्तान लियोनल मेसी, लिसान्र्डो पारेदेश, गोन्जालो मोन्टिएल र लाउटारो मार्टिनेजले गोल गर्दा इन्जो फर्नान्डेजले पेनाल्टी मिस गरे ।
यता, डच टोलीका टिउन कोपमेनियर्स, ओउट वेगहोस्र्ट र लुक डि जोङले पेनाल्टीमा गोल गर्दा होल्याण्डका कप्तान भर्जिल भान डाइक र स्टेभेन बेर्गहुलिसले पेनाल्टी खेर फाले ।
त्यसअघि लुसाइल आइकोनिक रंगशालामा खेलको ३५ औं मिनेटमा नहुइल मोलिनाको गोलमार्फत उपाधि दाबेदार अर्जेन्टिनाले खेलमा १–० को अग्रता बनाएका थिए । उक्त गोलका लागि मेसीले अवसर सिर्जना गरिदिएका थिए ।
यता, ७३ औं मिनेटमा मेसीले पेनाल्टीमार्फत गोल गर्दा खेल अर्जेन्टिनाको पक्षमा २–० ले अघि बढेको थियो । तर, ८३ औं मिनेटमा वेगहोस्टले गोल गर्दा नेडरल्याण्ड खेलमा फर्कने संकेट गर्यो ।
त्यसपछि खेलको अन्तिम समयमा वेगहोस्टले नै व्यक्तिगत रुपमा दोस्रो गोल गर्दा खेल २–२ को बराबरीमा सकियो ।
त्यसपछि अतिरिक्त ३० मिनेटको समयमा दुबै टोलीबाट थप गोल नभएपछि खेलको निर्णय पेनाल्टी सुटआउटमार्फत भएको हो ।
जितसंगै अर्जेन्टिनाले अन्तिम चारमा साविक उपविजेता क्र्रोसियासंग भिड्ने पक्का गरेको छ ।
लेखक
