एजेन्सी । दक्षिण अफ्रिका आईसीसी महिला टि–२० विश्वकपको फाइनलमा प्रवेश गरेको छ ।
विहिवार राति भएको सेमिफाइनल खेलमा साविक विजेता समेत रहेको अष्ट्रेलियालाई ८ विकेटले पराजित गर्दै दक्षिण अफ्रिका फाइनलमा प्रवेश गरेको हो ।
योसंगै गत संस्करणको फाइनल खेलको हारको बदला समेत दक्षिण अफ्रिकाले लिएको छ ।
दक्षिण अफ्रिकामा भएको गत संस्करणको विश्वकपको उपाधि भिडन्तमा अष्ट्रेलियाले दक्षिण अफ्रिकालाई १९ रनले पराजित गरेको थियो ।
अष्ट्रेलिया टि–२० को सर्वाधिक सफल टोली समेत हो ।
उसले टि–२० को ६ विश्वकप उपाधि जितेको छ ।
युएईको दुबईस्थित दुबई अन्तर्राष्ट्रिय क्रिकेट रंगशालामा भएको खेलमा १३५ रनको विजयी लक्ष्यका साथ जवाफी ब्याटिङमा उत्रिएको साविक उपविजेता समेत रहेको दक्षिण अफ्रिकाले १७.२ ओभरमा मात्र २ विकेट गुमाउँदै पूरा गर्यो ।
दक्षिण अफ्रिकालाई जित दिलाउन आनेके बोस्चले ४८ बलमा ८ चौका र १ छक्का प्रहार गर्दै ७४ रनको अर्धशतकिय पारी खेल्दै अविजित रहँदा कप्तान तथा ओपनर ब्याटर लौरा उल्भार्ड्टले ३७ बल खेल्नेक्रममा ३ चौका र १ छक्का प्रहार गर्दै ४२ रन जोडेर पेविलियन फर्किन् ।
त्यस्तै, अर्का ओपनर ताज्मिन ब्रिट्सले १५ बलमा १ चौका र १ छक्का प्रहार गर्दै १५ रन जोडेर आउट हुँदा क्लोइ ट्रायन १ रनमा अविजित रहिन् ।
दक्षिण अफ्रिकाले अतिरिक्त रुपमा ३ रन जोड्यो ।
अष्ट्रेलियाका लागि अनाबेल सडरल्याण्डले २ विकेट लिइन् ।
त्यसअघि टस हारेर पहिला ब्याटिङमा उत्रिएको अष्ट्रेलियाले निर्धारित २० ओभरको खेलमा ५ विकेट गुमाउँदै १३४ रन जोड्यो ।
साविक विजेता टोलीका लागि ओपनर ब्याटर तथा विकेटकिपर बेथ मोनीले ४२ बलमा २ चौका प्रहार गर्दै ४४ रन जोड्दा कप्तान ताहलिया म्याकग्रेथले ३३ बल खेल्दै ३ चौका प्रहार गरेर २७ रन जोडेर पेविलियन फर्किन् ।
त्यस्तै, इल्से पेरीले २३ बलमा २ चौका प्रहार गरेर ३१ रन जोड्दै आउट हुँदा फोएब लिट्चफिल्डले ९ बल खेल्नेक्रममा ३ चौका प्रहार गरेर १६ रन जोड्दै अविजित रहिन् ।
यता, जर्जिया वेरेह्यामले ५ रन जोड्दा अर्का ओपनर ग्रेुस ह्यारिस ३ रनमा पेविलियन फर्किन् ।
अष्ट्रेलियाले अतिरिक्त रुपमा ८ रन जोड्यो ।
दक्षिण अफ्रिकाका लागि अयाबोङ्गा खाकाले २ विकेट लिँदा मारिजान काप र नोनकुलुलेको माल्बाले समान १–१ विकेट लिइन् ।
लेखक
