एजेन्सी । अफगानिस्तानमाथि सहज जित निकाल्दै दक्षिण अफ्रिका आईसीसी टि–२० विश्वकपको फाइनलमा प्रवेश गरेको छ ।
विहिवार विहान भएको सेमिफाइनल खेलमा अफगानिस्तानमाथि ९ विकेटको सहज जित निकाल्दै दक्षिण अफ्रिका विश्वकपको फाइनलमा प्रवेश गरेको हो ।
अब दक्षिण अफ्रिकाले उपाधिका लागि साविक विजेता इंग्ल्याण्ड र भारतबीचको विजेतासंग प्रतिस्पर्धा गर्नेछ ।
वेस्ट इन्डिजको बार्यन लारा क्रिकेट रंगशालामा भएको खेलमा ५७ रनको सामान्य विजयी लक्ष्य पछ्याएको दक्षिण अफ्रिकाले ८.५ ओभरमा १ विकेट गुमाउँदै ६० रन जोड्यो ।
दक्षिण अफ्रिकाको जितमा ओपनर ब्याट्सम्यान रिजा हेन्डरिक्सले २५ बलमा ३ चौका र १ छक्का प्रहार गर्दै २९ रन जोडेर अविजित रहँदा कप्तान ऐडिन मार्करामले २१ बल खेल्दै ४ चौका प्रहार गरेर २३ रन जोड्दै अविजित रहे ।
त्यस्तै, विकेटकिपर क्विन्टन डि ककले ५ रन जोडे ।
दक्षिण अफ्रिकाले अतिरित्तः रुपमा ३ रन जोड्यो ।
अफगानिस्तानका लागि फजलहक फारुकीले १ विकेट लिए ।
त्यसअघि टस जितेर पहिला ब्याटिङमा उत्रिएको अफगानिस्तानले ११.५ ओभरमा अलआउट हुँदै मात्र ५६ रन जोड्यो ।
अफगानिस्तानका लागि अज्मतुलाह ओमारजायीले १२ बलमा २ चौका प्रहार गर्दै १० रन जोड्दा अन्य कुनैपनि ब्याटरले दोहोरो अंकमा रन जोड्न सकेनन् ।
गुलबदिन नायब ९, कप्तान राशिद खान र करिम जनत समान ८–८, नविन उल हक, नानगेयालिया खरोटे र इब्राहिम जडरान २–२ रनमा आउट हुँदा विकेटकपिर रहमानुल्लाह गुरबाज, मोहम्मद नाबी र नुर अहमेदले अंकको खाता नै खोल्न सकेनन् ।
फजलहक फारुकी २ रनमा अविजित रहे ।
अफगानिस्तानले अतिरिक्त रुपमा १३ रन जोड्यो ।
अफगानिस्तानलाई कम स्कोरमा धराशायी बनाउन दक्षिण अफ्रिकाका लागि मार्को जनसेन र तबराइज शाम्सीले समान ३–३, कागिसो राबडा र एनरिच नोर्ट्जेले समान २–२ विकेट लिए ।
लेखक
