भक्तपुर । ट्राइब्रेकरमा जित निकाल्दै नेपाल सातौं संस्करणको साफ महिला च्याम्पियनसिपको फाइनलमा प्रवेश गरेको छ ।
आईतवार भएको सेमिफाइनल खेलमा चिरपरिचित प्रतिद्वन्दी भारतलाई ट्राइब्रेकरमा ४–२ गोलअन्तरले पराजित गर्दै नेपाल महिला साफको फाइनलमा प्रवेश गरेको हो ।
हारसंगै सर्वाधिक पाँचपल्टको सफल टोली भारत प्रतियोगिताबाट बाहिरिएको छ ।
साविक उपविजेता नेपाललाई फाइनलमा पु¥याउन नेपालका लागि पेनाल्टीमा साबित्रा भण्डारी साम्बा, गिता राणा, सविता राणामगर र अमिषा कार्कीले गोल गरे ।
भारतका लागि भने मनिषा कल्याण र अञ्जना देसाईले मात्र पेनाल्टीमा गोल गर्न सके ।
भारतकी कप्तान आशलता देबी र रञ्जना चानुको प्रहार भने नेपालकी गोलकिपर अन्जना राणामगरले बचाउ गरे ।
काठमाडौंको त्रिपुरेश्वरस्थित दशरथ रंगशालामा भएको विवादास्पद खेल निर्धारित समयमा १–१ को बराबरीमा सकिएपछि खेलको निर्णय ट्राइब्रेकरबाट लिइयो ।
त्यसअघि पहिलो हाफ गोलरहित बराबरीमा सकिएको खेल दोस्रो हाफमा पुग्दा नाटकिय रुप लियो ।
दोस्रो हाफको सुरुतिरै नेपालकी फरवार्ड रेखा पौडेलले दोहोरो पँहेलो कार्ड खाँदै मैदानबाट बाहिरिदा नेपाल १० खेलाडीमा समेतियो ।
रेखा मैदानबाट बाहिरिएसंगै केहि समय खेल रोकिन पुगेको थियो ।
दर्शक दिर्घाबाट केहि अवरोध उत्पन्न भएसंगै रेफ्रीले केहि समयका लागि खेल रोकेका थिए ।
पुनः सुरु भएको खेलको ७१ औं मिनेटमा भारतले गोल गर्दा नेपाल १–० ले पछि परेको थियो ।
तर, त्यस लगत्तै रेफ्रिको इसारासंगै बल चालेको नेपालले सिद्वै गोल गरे ।
तर, भारतिय खेलाडीहरु तयार नभएको भन्दै रेफ्रीले गोल दिएन ।
त्यसपछि नेपाली टोलीले विरोध गर्दा खेल एक घण्टा ६ मिनेट भन्दा बढी रोकिन पुग्यो ।
तनाव मथर भएसंगै सुरु भएको खेलमा १४० औं मिनेटमा प्रिति राईको असिस्टमा साम्बाले गोल फर्काउँदा खेल १–१ को बराबरीमा आयो ।
त्यसपछि खेलको निर्णय ट्राइब्रेकरबाट भयो ।
अब नेपालले उपाधिका लागि साविक विजेता बंगलादेशसंग खेल्नेछ ।
लेखक
