भक्तपुर । काठमाडौंमा जारी टि–२० अन्तर्राष्ट्रिय त्रिदेशिय सिरिजअन्तर्गत लिग चरणको अन्तिम खेल वर्षाले प्रभावित बनेपछि खेल रद्द भएको छ ।
आईतवारको नामिबिया र नेडरल्याण्ड्सबीचको खेल बर्षाले प्रभावित बनेपछि खेल पूरा हुन नपाउँदै रद्द भएको हो ।
खेल रद्द भएसंगै दुबै टोलीले १–१ अंक पाए ।
फाइनल प्रवेश गर्न बलियो नेडरल्याण्ड्समाथि फराकिलो जित जरुरी रहेको अवस्थामा वर्षा बाधक बन्दा नामिबिया फाइनल प्रवेश गर्न असफल रह्यो ।
योसंगै टि–२० सिरिजमा नेडरल्याण्ड्सले ४ खेलबाट २ मा जित, १ मा हार र एक खेल नतिजा विहिन हुँदा ५ अंक जोडेर तालिकाको शीर्ष स्थानमा रहन सफल भयो ।
त्यस्तै, नेपालले भने ४ खेलमध्येमा २ मा जित र २ मा हारको नतिजा निकाल्दै ४ अंक जोडेर तालिकाको दोस्रो स्थानमा रह्यो ।
यता, नामिबियाको भने ४ खेलमध्येबाट १ मा जित, २ मा हार र १ खेल नतिजा विहिन हुँदा ३ अंक जोडेर तालिकाको पुच्छारमा रह्यो ।
योसंगै अंक तालिकामा पहिलो र दोस्रो भएका नेडरल्याण्ड्स र नेपालले सिरिजको उपाधिका लागि फाइनलमा प्रतिस्पर्धा गर्ने तय भएको छ ।
फाइनल खेल मंगलवार हुनेछ ।
त्यसअघि काठमाडौंको क्रितिपुरस्थित टियु क्रिकेट मैदानमा टस हारेर पहिला ब्याटिङमा उत्रिएको नामिबियाले वर्षाले खेल बिथोलिनु पुर्व १५ ओभर खेल्दा ४ विकेट गुमाउँदै ९८ रन जोडेको थियो ।
नामिबियाका लागि निकोल लोफ्टी इटनले २९ बलमा २ चौका र २ छक्का प्रहार गर्दै ३४ रन जोडेर क्रिजमा रहँदा जेन ग्रिनले पनि १० बल खेल्दै १ चौका प्रहार गरेर ११ रनमा क्रिजमा थिए ।
यता, नामिबियाका लागि कप्तान जेजे स्मिथले १७, मलान क्रुगरले २४, जिन पिइरे कोट्जेले ६ र जान फ्राइलिंकले ५ रन जोडेर पेविलियन फर्किए ।
डच टोलीका लागि भिभियान किंगमा, टिम भान देर गगटेन, आर्यान दत्त र रोयल्फ भान देर मेर्वेले समान १–१ विकेट लिए ।
लेखक
