एजेन्सी । घरेलु टोली दक्षिण अफ्रिकालाई १९ रनले पराजित गर्दै अष्ट्रेलियाले दक्षिण अफ्रिकामा जारी आईसीसी महिला टि–२० विश्वकप जितेको छ ।
आइतवार भएको फाइनल खेलमा १५७ रनको विजयी लक्ष्य पछ्याएको दक्षिण अफ्रिका निर्धारित २० ओभरमा ६ विकेट गुमाउँदै १३७ रनमा समेतिएसंगै अष्ट्रेलिया सन् २०२३ को महिला टि–२० विश्वकपको च्याम्पियन बनेको हो ।
न्युल्याण्ड क्रिकेट ग्राउण्डमा भएको फाइनल खेलमा घरेलु टोलीका लागि लोरा ओलभार्तले ४८ बलमा ५ चौका र ३ छक्का प्रहार गर्दै सर्वाधिक ६१ रनको अर्धशतकिय पारी खेलिन् । क्लोइ ट्रायनले २३ बलमा २ चौका र १ छक्का मद्दतमा २५ रन जोडिन् ।
त्यस्तै, ताज्मिन ब्रिट्सले १७ बलमा १ चौका प्रहार गर्दै १० रन बनाउँदै आउट हुँदा मारिजन कापले ११ बलमा २ चौका प्रहार गर्दै ११ रन जोड्दै पेविलियन फर्किन् ।
घरेलु टोलीका अन्य ब्याटरले दोहोरो अंकमा रन जोड्न सकेनन् । कप्तान सुन लुस २ तथा एनेके बोस १ रनमा आउट भईन् ।
यता, विकेटकिपर सिनालो जाफ्टा ९ तथा नदिन दि क्लर्क ८ रनमा अविजित रहिन् ।
दक्षिण अफ्रिकाले १० रन अतिरिक्त रुपमा जोडेको थियो । अष्ट्रेलियाका लागि मेगन सट, एस्ली गार्डनर, दार्सी ब्राउन र जेस जोनसनले समान १–१ विकेट लिईन् ।
त्यसअघि टस जितेर पहिला ब्याटिङमा उत्रिएको अष्ट्रेलियाले निर्धारित २० ओभरको खेलमा ६ विकेट गुमाउँदै १५६ रन बनाएको थियो ।
अष्ट्रेलियाका लागि बेथ मोनीले ५३ बलमा ९ चौका र १ छक्का प्रहार गर्दै सर्वाधिक ७४ रन बनाउँदै अविजित रहिन् ।
त्यस्तै, एस्ली गार्डनरले २१ बलको सामना गर्दा २ चौका र २ छक्काको मद्दतमा २९ रन बनाउँदा विकेटकिपर एस्ले हिलेले २० बलमा ३ चौका प्रहार गर्दै १८ रन जोडिन् ।
कप्तान मेग लानेङ ११ बलमा १ चौका मद्दतमा १० रनमा पेविलियन फर्किदा ग्रेस ह्यारिस ९ बलमा १ चौका प्रहार गर्दै १० रनमा आउट भईन् ।
एल्सा पेरी ७ रनमा आउट हुँदा जोर्जिया वारेहम शुन्य रनमा पेविलियन फर्किइन् । ताह्लिया म्याकग्राथ १ रनमा अविजित रहिन् ।
अष्ट्रेलियाले अतिरिक्त रुपमा ७ रन जोड्यो । दक्षिण अफ्रिकाका लागि शबनम इस्माइल र मारिजान कापले समान २–२ विकेट हात पार्दा ननकुलुलेको मलाबा र चोलेइ ट्रायनले १–१ विकेट लिईन् ।
लेखक
