भक्तपुर । नेपालले आईसीसी महिला टि–२० विश्वकप एसिया छनोटअन्तर्गत कुवेतमाथि फराकिलो जित निकालेको छ ।
विहिवार भएको छनोटअन्तर्गत दोस्रो खेलमा नेपालले कुवेतमाथि १०८ रनको फराकिलो जित निकालेको हो ।
छनोट प्रतियोगितामा यो नेपालको लगातार दोस्रो जित हो ।
यसअघि बुधवार भएको पहिलो खेलमा नेपालले थाइल्याण्डमाथि ६७ रनको जित निकालेको थियो ।
योसंगै नेपालले छनोट तालिकामा २ खेलबाट ४ अंक जोड्दै शीर्ष स्थानमा कायम रहेको छ ।
युएईको दुबईस्थित द सेभेन्स स्टेडियममा भएको खेलमा टस जितेर पहिला ब्याटिङ रोजेको नेपालले निर्धारित २० ओभरको खेलमा ८ विकेट गुमाउँदै १३० रन जोड्यो ।
नेपालका लागि कप्तान पुजा महतोले ३८ बलमा ४ चौका प्रहार गर्दै ३४ रन जोडेर आउट हुँदा साना प्रविनले १८ बल खेल्नेक्रममा ५ चौका प्रहार गर्दै २५ रज जोडिन् ।
त्यस्तै, जोत्सिनिका मरासिनीले १८ बल खेल्दै २३ रन जोडिन् ।
कुवेतका लागि अलेशा पेवेकरले २ विकेट लिँदा जिफा जिलानीले १ विकेट लिइन् ।
यता, १३१ रनको विजयी लक्ष्यका साथ मैदान उत्रिएको कुवेतले १३ ओभर खेल्नेक्रममा मात्र २२ रन जोडेर अलआउट भयो ।
कुवेतका लागि जिफा जिलानीले १७ बलमा १२ रन जोडिन् ।
नेपालका लागि चरना चौधरी र सिमाना केसीले २–२ विकेट लिँदा पुजा महतो, कष्मा गुरुङ र मनिषा उपाध्यायले १–१ विकेट लिइन् ।
छनोटअन्तर्गत नेपालले तेस्रो खेल सनिवार युएईसंग खेल्नेछ ।
लेखक
