भक्तपुर । आईसीसी विश्वकप छनोटअन्तर्गत पहिलो खेलमा नेपाल पराजित भएको छ ।
आईतवार भएको क्वालिफायरअन्तर्गत पहिलो खेलमा नेपाल घरेलु टोली जिम्बावेसंग ८ विकेटले पराजित भएको हो ।
जिम्बावेस्थित हरारे स्पोर्ट्स क्लबमा भएको खेलमा नेपालले दिएको २९१ रनको विजयी लक्ष्य जिम्बावेले ४४.२ ओभरमा मात्र २ विकेट गुमाउँदै पूरा गर्दा नेपाल ८ विकेटले पराजित भएको हो ।
नेपाललाई हराउन जिम्बावेका लागि कप्तान क्रेइग इर्भाइनले १२८ बलमा १५ चौका र १ छक्का प्रहार गर्दै अविजित १२१ रनको शतकिय पारी खेल्दा सेन विलियम्सले ७० बल खेल्दै १३ चौका र १ छक्का प्रहार गर्दै १०२ रनको शतकिय पारी खेल्दै अविजित रहे ।
त्यस्तै, वेस्ले मधेभेरेले ३८ बलमा २ चौका प्रहार गर्दै ३२ रन जोड्दै पेविलियन फर्किदा जोयलर्ड गुम्वेइले २९ बल खेल्दै ५ चौका मद्दतमा २५ रन जोडेर आउट भए । घरेलु टोलीले अतिरिक्त रुपमा ११ रन जोड्यो ।
नेपालका लागि सोमपाल कामीले ५.३ ओभर बलिङ गर्दै ३० रन दिएर १ मेडनसहित १ विकेट लिँदा गुलशन झाले ८ ओभर बलिङ गर्दै ५६ रन खर्चिएर १ विकेट लिए ।
त्यसअघि टस हारेर पहिला ब्याटिङमा उत्रिएको नेपालले निर्धारित ५० ओभरको खेलमा ८ विकेट गुमाउँदै २९० रन जोडेको थियो ।
नेपालका लागि कुशल भुर्तेलले ९५ बलमा १३ चौका र २ छक्का प्रहार गर्दै सर्वाधिक ९९ रनको पारी खेले । कुशल जिम्बावेका वेलिङटन मासाकाद्जाको बलमा बोल्ड हुँदा मात्र एक रनले शतक बनाउन चुके ।
त्यस्तै, नेपालका लागि आसिफ शेखले १०० बलमा ७ चौका प्रहार गर्दै ६६ रनको अर्धशतकिय पारी खेल्दा कुशल मल्लले ४२ बलमा २ चौका र ३ छक्का प्रहार गर्दै ४१ रन जोड्दै पेविलियन फर्किए ।
कप्तान रोहित पौडेलले २९ बलमा ५ चौका प्रहार गर्दै ३१ रन जोडेर पेविलियन फर्किदा गुलशन झाले १३ बलमा १ चौका मद्दतमा १३ रन जोडदै आउट भए ।
आरिफ शेखले १० बलमा ११ रन जोड्दै आउट हुँदा भिम सार्की शुन्य रनमा पेविलियन फर्किए ।
दिपेन्द्र सिंह ऐरीले ६ रन जोडेर आउट हुँदा करण केसी २ रनमा अविजित रहे । नेपालले अतिरिक्त रुपमा २२ रन जोड्यो ।
घरेलु टोलीका लागि रिर्चाड एनगाराभाले सर्वाधिक ४ विकेट लिँदा वेलिङटन मासाकाद्जाले २ विकेट लिए । त्यस्तै, तेनदाइ छतारा र ब्लेसिङ मुजाराबानीले समान १–१ विकेट लिए ।
लेखक
