भक्तपुर । आयोजक टोली केपी ओली एफसीमाथि जित हासिल गर्दै जावलाखेल युथ क्लब दोस्रो संस्करणको केपी ओली कप फुटबल च्याम्पियनसिपको सेमिफाइनलमा प्रवेश गरेको छ ।
मंगलवार भएको क्वाटरफाइनल खेलमा आयोजक केपी ओली एफसीमाथि २–१ को जित हासिल गर्दै ‘ए’ डिभिजन क्लब जावलाखेल युथ क्लब केपी ओली कपको सेमिफाइनलमा प्रवेश गरेको हो ।
पराजयसंगै आयोजक टोली भने प्रतियोगिताबाट बाहिरिएको छ ।
ललितपुरको सातदोबाटोस्थित एन्फा कम्प्लेक्स मैदानमा भएको खेलमा जावलाखेलको जितमा निराजन धामी र निरज चौधरीले गोल गर्दा पराजित टोलीका लागि अदमा दौम्बियाले एक गोल फर्काए ।
आयोजक टोलीका कमल श्रेष्ठले ब्याक पास गरेको बललाई नियन्त्रणमा लिँदै निराजनले सहजै गोल गर्दै जावलाखेललाई सुरुवाती अग्रता दिलाए ।
त्यस्तै, दोस्रो हाफमा परिर्वतित खेलाडीका रुपमा मैदान छिरेका निरज चौधरीले ८१ औं मिनेटमा डिबक्स बाहिर गोल गर्दै जावलाखेललाई २–० ले अघि बढाए ।
तर, खेलको ८३ औं मिनेटमा मिलनको फ्रिकिकमा अदमा दौम्बियाले गोल फर्काउँदै आयोजक टोलीलाई २–१ को अवस्थामा ल्याए ।
त्यसपछि खेलमा थप गोल निस्किएन र जावलाखेल २–१ ले विजयी भयो ।
लेखक
