एजेन्सी । स्पेनिस महारथी रियल मड्रिडले युरोपेली फुटबलको सर्वाधिक लोकप्रिय प्रतियोगिता युईएफए च्याम्पियन्स लिगअन्तर्गत अन्तिम १६ को खेलमा जर्मन क्लब आरबी लाइपजिङमाथि साँघुरो जित निकालेको छ ।
मंगलवार राति भएको अन्तिम १६ अन्तर्गत पहिलो लेगमा युरोपेली शीर्ष फुटबलको सर्वाधिक सफल क्लब रियल मड्रिडले आरबी लाइपजिङमाथि १–० को साँघुरो जित निकालेको हो ।
जर्मन क्लबको घरेलु मैदान रेडबुल एरिना रंगशालामा भएको खेलमा भ्रमणकारी टोलीलाई जिताउन ब्राहिम डाइजले एकमात्र निर्णायक गोल गरे ।
पहिलो हाफ गोलरहित बराबरीमा सकिएको खेलमा दोस्रो हाफको ४८ औं मिनेटमा ड्यानी कार्भाजलको असिस्टमा डाइजले गोल गर्दै मड्रिडलाई १–० ले जिताए ।
साँघुरो जितसंगै मड्रिडले पहिलो लेग खेलमा १ गोलको अग्रता लिएको छ ।
अब दोस्रो लेग खेल मार्च ७ तारिखमा मड्रिडको घरेलु मैदान स्यान्टियागो बेर्नाबाउमा हुनेछ ।
लेखक
