भक्तपुर । जनकपुर बोल्ट्सले पहिलो संस्करणको नेपाल प्रिमियर लिग (एनपिएल) को उपाधि जितेको छ ।
सनिवार भएको फाइनल खेलमा चिरपरिचित प्रतिद्वन्दी सुदुरपश्चिम रोयल्सलाई ५ विकेटले पराजित गर्दै जनकपुर बोल्ट्सले एनपिएलको उपाधि जितेको हो ।
योसंगै जनकपुरले लिग चरण र प्लेअफमा बेहोरेको हारको बदला समेत लिएको छ ।
जनकपुरलाई ऐतिहासिक उपाधि दिलाउन ओपनर ब्याट्सम्यान लाहिरु मिलान्थाले ४९ बलमा ९ चौका र ४ छक्का प्रहार गर्दै सर्वाधिक ८७ रनको अर्धशतकिय पारी खेल्दा चौथौं नम्बर ब्याटिङमा आएका हर्ष थाकेरले २४ बल खेल्नेक्रममा २ छक्का प्रहार गर्दै ३० रन जोडेर अविजित रहे ।
त्यस्तै, अर्का ओपनर तथा कप्तान आसिफ शेखले १९ बल खेल्नेक्रममा ४ चौका र २ छक्का प्रहार गर्दै ३३ रन जोडेर पेविलियन फर्किदा सातौं नम्बरमा ब्याटिङ गर्न आएका मयन यादवले २ रन जोडेर अविजित रहे ।
यता, तेस्रो नम्बरमा आएका मोहम्मद मोहसिन ९, पाँचौं नम्बरमा जेम्स जिशम ४ तथा छैटौं नम्बरमा आएका आकाश त्रिपाठी २ रनमा पेविलियन फर्किए ।
जनकपुरले अतिरिक्त रुपमा १८ रन जोड्यो ।
सुदुरपश्चिमका लागि कप्तान दिपेन्द्र सिंह ऐरी, इशान पाण्डे, सैफ जैब र स्कट कगेलैनले समान १–१ विकेट लिए ।
त्यसअघि टस जितेर पहिला ब्याटिङमा उत्रिएको सुदुरपश्चिम रोयल्सले निर्धारित २० ओभरको खेलमा ९ विकेट गुमाउँदै १८४ रन जोड्यो ।
सुदुरपश्चिमका लागि ओपनर ब्याट्सम्यान सैफ जैबले ४३ बलमा ८ चौका र २ छक्का प्रहार गर्दै ६९ रनको अर्धशतकिय पारी खेल्दा अर्का ओपनर विनोद भण्डारीले ३१ बल खेल्नेक्रममा १ चौका र ३ छक्का प्रहार गर्दै ४१ रन जोडेर पेविलियन फर्किए ।
त्यस्तै, तेस्रो नम्बरमा ब्याटिङमा उत्रिएको ब्रान्डन म्याकमुलेनले १२ बलमा १ छक्का प्रहार गर्दै १४ रन जोडेर आउट हुँदा चौथौं नम्बरमा आएका हरमित सिंहले ८ बल खेल्दै १ छक्का प्रहार गरेर १४ रन बनाएर पेविलियन फर्किए ।
यता, पाँचौं नम्बरमा आएका कप्तान दिपेन्द्र सिंह ऐरीले ७ बल खेल्नेक्रममा ९ रन जोडेर आउट हुँदा छैटौं नम्बरमा ब्याटिङका लागि आएका स्कट कगेलैनले १० बलमा २ चौका प्रहार गर्दै १३ रन जोड्दै पेविलियन फर्किए ।
नवौं नम्बरमा ब्याटिङका लागि आएका नरेश बुढाएर ८, आठौं नम्बरमा आएका इशान पाण्डे ६ र सातौं नम्बरमा आएका आरिफ शेख १ रनमा पेविलियन फर्किदा १० औं नम्बरमा आएका नरेन साउद १ रनमा अविजित रहे ।
सुदुरपश्चिमले अतिरिक्त रुपमा ८ रन जोड्यो ।
जनकपुरका लागि किशोर महतो र मोहम्मद मोहसिनले समान ३–३ विकेट लिँदा ललित राजबंशी र जेम्स निशमले १–१ विकेट लिए ।
लेखक
