एजेन्सी । स्पेनिस महारथी रियल मड्रिड युरोपेली क्लब फुटबलको शीर्ष प्रतियोगिता युईएफए च्याम्पियन्स लिगमा एसी मिलानसंग स्तब्ध भएको छ ।
मंगलवार राति भएको लिग चरणअन्तर्गत खेलमा च्याम्पियन्स लिगको सर्वाधिक सफल क्लब समेत रहेको रियल मड्रिड इटालियन क्लब एसी मिलानसंग ३–१ ले स्तब्ध भएको हो ।
स्पेनिस क्लबको घरेलु मैदान स्यान्टियागो बेर्नाबाउ रंगशालामा भएको खेलमा १२ औं मिनेटमा क्रिस्टियन पुलिसिकको पासमा मलिक थियाओको गोलमार्फत् भ्रमणकारी टालीले सुरुवाती अग्रता लियो ।
तर, २३ औं मिनेटमा घरेलु टोलीका लागि भिनिसियस जुनियरले पेनाल्टीमा गोल फर्काउँदा खेल १–१ को बराबरीमा आयो ।
यता, ३९ औं मिनेटमा अल्भारो मोराटाले गोल गर्दा सिरी ए क्लब २–१ ले अघि बढ्यो ।
दोस्रो हाफको ७३ औं मिनेटमा राफायल लियोको पासमा तिजानी रैजेन्डर्सले गोल थप्दा मिलान ३–१ ले विजयी भयो ।
यता, महत्वपूर्ण जितसंगै मिलानले ४ खेलबाट ६ अंक जोडेर लिग तालिकाको १८ औं स्थानमा उक्लियो ।
तुलनात्मक रुपमा बलियो मानिएको मड्रिड घरमै स्तब्ध बनेसंगै ४ खेलबाट ६ अंक जोडेर लिग तालिकाको १७ औं स्थानमा झरेको छ ।
लेखक
