एजेन्सी । स्पेनिस महारथी बार्सिलोनाले युईएफए च्याम्पियन्स लिगअन्तर्गत खेलमा बिएससी योङ्ग ब्वाइजमाथि फराकिलो जित हासिल गरेको छ ।
मंगलवार राति भएको खेलमा ला लिगा महारथी बार्सिलोनाले स्विज क्लब बिएससी योङ्ग ब्वाइजमाथि ५–० को फराकिलो जित हासिल गरेको हो ।
क्याटलन क्लबको घरेलु मैदान इस्टाडी ओलम्पिक लुइस कम्पनिज रंगशालामा भएको खेलमा घरेलु टोलीलाई फराकिलो जित दिलाउन रोर्बट लेवान्डोस्कीले दुई गोल गर्दा राफिन्हा र इनिगो मार्टिनेजले एक–एक गोल थपे ।
अर्को एक गोल भने पराजित टोलीका मोहमेद अलीको आत्मघाती गोलमार्फत् बार्सिलोनाले प्राप्त गर्यो ।
खेल सुरु भएको आठौं मिनेटमा राफिन्हाको पासमा लेवान्डोस्कीले गोल गर्दै घरेलु टोलीलाई सुरुवाती अग्रता दिलायो ।
त्यसपछि ३४ औं मिनेटमा राफिन्हाले गोल थप्दा बार्सिलोना २–० ले अघि बढ्यो ।
त्यस्तै, ३७ औं मिनेटमा पेड्रीको पासमा मार्टिनेजले गोल गर्दा स्पेनिस क्लब ३–० ले अघि बढ्यो ।
दोस्रो हाफको ५१ औं मिनेटमा मार्टिनेजको पासमा लेवान्डोस्कीले व्यक्तिगत रुपमा दोस्रो गोल थप्दा ला लिगा क्लब ४–० ले अघि बढ्यो ।
यता, ८१ औं मिनेटमा स्विज क्लबका मोहम्मद अलीले आत्मघाती गोल गर्न पुग्दा क्याटलान क्लब ५–० ले विजयी भयो ।
फराकिलो जितसंगै बार्सिलोनाले २ खेलबाट ३ अंक जोडेर लिग तालिकाको १० औं स्थानमा उक्लेको छ ।
पराजित योङ्ग ब्वाइजले भने समान २ खेलमा दुबैमा हारका साथ शुन्य अंकसहित तालिकाको पुच्छारमा रहेको छ ।
लेखक
