एजेन्सी । जारी सन् २०२३–२४ सिजनको युरोपेली क्लब फुटबलको शीर्ष प्रतियोगिता युईएफए च्याम्पियन्स लिगको उपाधिका लागि रियल मड्रिड र बुरुसिया डर्टमण्ड भिड्दै छ ।
लण्डनस्थित वेम्बली रंगशालामा सनिवार राति हुने खेलमा स्पेनिस महारथी रियल मड्रिड र जर्मन क्लब बुरुसिया डर्टमण्ड आमनेसामने हुन लागेको हो ।
मड्रिडले सेमिफाइनलमा जर्मन महारथी बायर्न म्युनिखलाई पाखा लगाउँदै फाइनल यात्रा तय गर्दा डर्टमण्डले भने फ्रान्सेली महारथी पेरिस सेन्ट जर्मनलाई स्तब्ध तुल्याउँदै फाइनलमा प्रवेश गर्यो ।
मड्रिड च्याम्पियन्स लिगको सर्वाधिक सफल क्लब हो ।
उसले हालसम्म १४ युरोपेली शीर्ष प्रतियोगिताको उपाधि जितिसकेको छ ।
च्याम्पियन्स लिगमा सर्वाधिक १८ पल्ट फाइनल यात्रा तय गरेको मड्रिडले अहिलेसम्म तीन फाइनल खेलमात्र गुमाएको छ ।
मड्रिडले पछिल्लोपल्ट सन् २०२१–२२ को च्याम्पियन्स लिग जितेको थियो ।
जारी सिजनको लयलाई हेर्ने हो भने पनि मड्रिड तुलनात्मक रुपमा डर्टमण्ड भन्दा बलियो टोली रहेको छ ।
यता, अप्रत्यासित रुपमा फाइनल यात्रा तय गरेको जर्मन टोलीलाई पनि कमजोर आक्न सकिन्न ।
ग्रुप अफ डेथका रुपमा हेरिएकोै समूह ‘एफ’ मा पिएसजी, एसी मिलान र न्युक्यासल युनाइटेडलाई पछि पार्दै समूह विजेताका रुपमा अघि बढेको टोली हो डर्टमण्ड ।
उसले नकआउट चरणमा पनि पिएसभी, एट्लेटिको डि मड्रिड र पिएसजी जस्ता बलियो टोलीलाई पराजित गर्दै फाइनलसम्मको यात्रा तय गरेकाृ छ ।
डर्टमण्डले सन् १९९६–९७ सिजनमा च्याम्पियन्स लिगको उपाधि जितेको थियो ।
पछिल्लोपल्ट डर्टमण्डले सन् २०१२–१३ मा च्याम्पियन्स लिग फाइनल खेलेको थियो ।
जसमा डर्टमण्ड बायर्न म्युनिखसंग २–१ ले पराजित भएको थियो ।
आज राति हुने च्याम्पियन्स लिगको फाइनल खेल नेपाली समय अनुसार राति पौने १ बजे सुरु हुनेछ ।
लेखक
