भक्तपुर । हिमालयन शेर्पा क्लबमाथि महत्वपूर्ण जित निकाल्दै चर्च ब्वाइज युनाइटेडले सहिद स्मारक ‘ए’ डिभिजन लिगमा सतप्रतिशत जित कायम राखेको छ ।
शुक्रवार भएको खेलमा चर्च ब्वाइज युनाइटेडले हिमालयन शेर्पामाथि १–० को जित निकालेको हो ।
त्रिपुरेश्वरस्थित दशरथ रंगशालामा भएको खेलमा पहिलो हाफको २० औं मिनेटमा आशिष चौधरीले गरेको एकमात्र निर्णायक गोलको मद्दतमा चर्च ब्वाइजले जित हात पारेको हो ।
जारी लिगमा चर्च ब्वाइजले ३ खेल खेलिसक्दा ३ वटैमा जित निकाल्दै लिग तालिकामा ९ अंक जोड्दै शीर्ष स्थानमा रहेको छ ।
हिमालयन शेर्पाको ३ खेलमा ४ अंक छ । हिमालयन तालिकाको छैटौं स्थानमा रहेको छ ।
यसअघि एन्फा कम्प्लेस सातदोबाटोमा दिउँसो भएको खेलमा थ्रीस्टार क्लबले खुमलटार युवा क्लबलाई २–० ले पराजित गरेको छ ।
पहिलो हाफ गोलरहित बराबरीमा सकिएको खेलमा अजयी मार्टिन्सले ५४ र ८३ औं मिनेटमा गोल गर्दै थ्रीस्टारलाई जारी लिगमा पहिलो जित दिलाए ।
जितसंगै ललितपुरे क्लब थ्रीस्टारको ३ खेलमा ४ अंक जोड्दै लिग तालिकामा सातौं स्थानमा उक्लिएको छ ।
पराजित खुमलटारको समान खेलमा ३ अंक छ । खुमलटार एक स्थान तल झर्दै ९ औं स्थानमा पुगेको छ ।
लिगअन्तर्गत भोली (सनिवार) ३ खेल हुनेछन् ।
विभागिय नेपाल पुलिस क्लबले संकटा क्लबसंग च्यासल रंगशालामा दिउँसो २ः३० बजे प्रतिस्पर्धा गर्दा सोहि समयमा अर्को विभागिय क्लब नेपाल एपिएफ क्लबले जावलाखेल युवा क्लबसंग दशरथ रंगशालामा खेल्नेछ ।
त्यस्तै, साँझ ५ः३० बजे फ्रेन्ड्स क्लबले सातदोबाटो युवा क्लबसंग दशरथ रंगशालामा प्रतिस्पर्धा गर्नेछ ।
लेखक
