एजेन्सी । संयुक्त राज्य अमेरिकामा जारी २१ औं संस्करणको फिफा क्लब विश्वकपको क्वाटरफाइनल समिकरण पूरा भएको छ ।
बुधवार विहान अन्तिम १६ का खेलहरु सम्पन्न भएसंगै क्वाटरफाइनल खेल्ने आठ टोलीको टुंगो लागेको हो ।
क्वाटरफाइनलमा पुग्ने आठ टोलीमा स्पेनिस महारथी रियल मड्रिड, फ्रान्सेली महारथी पेरिस सेन्ट जर्मन (पिएसजी), इंग्लिस क्लब चेल्सी, जर्मन क्लब बायर्न म्युनिख र बुरुसिया डर्टमण्ड, ब्राजिली क्लब पाल्मेरस र फ्लुमिनेन्से तथा साउदी क्लब अल हिलाल रहेका छन् ।
अन्तिम १६ बाट साविक विजेता म्यानचेस्टर सिटीसंगै इन्टर मिलान, युभेन्टस, बेन्फिका, इन्टर मियामी, फ्लेमेङ्गो, बोटाफोगो र मोन्टेरी बाहिरएका छन् ।
प्रि–क्वाटरफाइनलका रुपमा समेत चिनिने अन्तिम १६ बाट चार बलिया युरोपेली टोली बाहिरिन पुग्यो ।
इंग्लिस महारथी म्यानचेस्टर सिटीलाई एसियाली क्लब अल हिलालले स्तब्ध पार्दा इटालियन टोली इन्टरलाई ब्राजिली टोली फ्लुमिनेन्से, अर्को इटालियन टोली युभेन्टसलाई मड्रिड र बेन्फिकालाई चेल्सीले पराजित गर्यो ।
अब क्वाटरफाइनलमा युरोपेली च्याम्पियन पिएसजीले म्युनिख, मड्रिडले डर्टमण्ड, चेल्सीले पाल्मेरस र फ्लुमिनेन्सेले अल हिलालसंग खेल्ने तालिका रहेको छ ।
क्वाटरफाइनलका खेलहरु जुलाइ ५ र ६ तारिखमा हुने तालिका रहेको छ ।
लेखक
