एजेन्सी । फिफा विश्वकप सकिएसंगै क्लब फुटबल फर्केको छ । मंगलवार राति इंग्लिस फुटबलको नकआउट प्रतियोगिता कारावाओ (इएफएल) कपको राउण्ड अफ १६ का ४ खेल सम्पन्न भए ।
गयराति सम्पन्न ४ खेलको चर्चा गरौं ।
न्युक्यासल युनाइटेडविरुद्व बर्नमाउथ
इएफएल कपको राउण्ड ४ मा इंग्लिस फुटबलको शीर्ष प्रिमियर लिग क्लबद्वय न्युक्यासल युनाइटेड र बर्नमाउथ आमनेसामने भएका थिए स्ट्यास जेम्स पार्क रंगशालामा ।
जारी सिजनको प्रिमियर लिगमा सनसनी प्रदर्शन गर्दै तालिकाको तेस्रो स्थानमा रहेको न्युक्यासलले १४ स्थानमा रहेको बर्नमाउथलाई १–० ले हरायो ।
प्रतिस्पर्धात्मक खेलको ६७ औं मिनेटमा बर्नमाउथका एडम स्मिथले आत्मघाती गोल गर्दा खेल घरेलु टोली न्युक्यासलले जित्यो ।
जितसंगै न्युक्यासल इएफएल कपको क्वाटरफाइनल प्रवेश गरेको छ ।
एमके डन्सविरुद्व लेस्टरसिटी
इंग्लिस फुटबलको तेस्रो श्रेणीको लिग वान क्लब एमके डन्सले गयराति प्रिमियर लिग क्लब लेस्टरसिटीसंग भिडेको थियो आफ्नै घररेलु मैदान रंगशाला एमकेमा ।
जहाँ घरेलु टोली बलियो लेस्टरसंग ३–० ले पराजित रह्यो । घरेलु एमके डन्स पहिलो हाफमै २–० ले पछि परिसकेको थियो ।
पहिलो हाफको १८ औं मिनेटमा यौरी टेलिसम्यान र २९ औं मिनेटमा अयोजे पेरिजले गोल गरेका थिए ।
यता दोस्रो हाफको ५० औं मिनेटमा जेमी भार्डीले गोल गर्दा लेस्टर ३–० को आरामदायी जित निकाल्न सफल भयो ।
हारसंगै लिग वान क्लबको कारावाओ कपको अन्त्य हुँदा प्रिमियर लिग क्लबले भने अन्तिम ८ को सिट सुरक्षित गर्यो ।
उल्भ्सविरुद्व गिलिङ्घम
प्रिमियर लिग क्लब उल्भ्स गयराति इंग्लिस फुटबलको चौंथौं श्रेणीको क्लब गिलिङ्घमसंग घरेलु मैदानमा भिडेको थियो । जहाँ घरेलु टोली २–० ले विजयी रह्यो ।
घरेलु टोलीका लागि खेलको ७७ औं मिनेटमा राउल जेमिनेजले सुरुवाती अग्रता दिलाउँदा खेलको अन्त्यतिर रायन अइट नौरीले गोल गरे ।
यसअघि मोलिनियोक्स रंगशालामा भ्रमणकारी गिलिङ्घमले बलियो क्लबमाथि गोलरहित बराबरीमा रोकेको थियो ।
जितसंगै उल्भ्स कारावाओ कपको क्वाटरफाइनल प्रवेश गरेको छ ।
साउथह्याम्टनविरुद्व लिङकोल्न
प्रिमियर लिग क्लब साउथह्याम्टन इएफएल कपको प्रि–क्वाछरफाइनलमा लिग वान क्लब लिङकोल्नसंग घरेलुमैदानमा भिडेको थियो ।
भ्रमणकारी टोलीले खेलको दोस्रो मिनेटमै खेलमा अग्रता बनायो । साउथह्याम्टनका खेलाडी गाभिन बाजुनुले आफ्नै पोस्टमा बल छिराउन पुगेपछि खेलमा लिङकोल्न १–० ले अघि बढ्यो ।
तर, २५ औं मिनेटमा घरेलु टोली खेलमा फर्कियो । उसका लागि चे एडम्सले गोल गर्दै खेल १–१ को बराबरीमा ल्याए ।
यता ७४ औं मिनेटमा एडम्सले नै व्यक्तिगत र क्लबका लागि दोस्रो गोल गर्दा खेल घरेलु टोलीले २–१ ले जित्यो ।
पराजयसंगै लिग वान क्लब प्रतियोगिताबाट बाहिरिदा पुनरागमन जित निकालेको प्रिमियर लिग क्लब अन्तिम ८ मा प्रवेश गर्यो ।
इएफएल कपअन्तर्गत आज राति पनि राउण्ड अफ १६ का ४ खेल हुँदैछन् ।
लेखक
