एजेन्सी । इंग्लिस प्रिमियर लिगअन्तर्गत बुधवार राति टोटनहम हटस्परले क्रिस्टल प्यालेसमाथि फराकिलो जित निकालेको छ ।
क्रिस्टल प्यालेसको घरेलु मैदान सेलहुस्र्ट पार्कमा टोटनहम ४–० ले विजयी रह्यो । स्पर्सका रुपमा चिनिने टोटनहमको जितमा ह्यारी केनले २ गोल गर्दा म्याट दोहेर्टी र सन ह्युङ मिनले १–१ गोल गरे ।
पहिलो हाफ गोलरहित बराबरीमा सकिएको खेलमा दोस्रो हाफको ४८ औं मिनेटमा इभान पेरिसिकको असिस्टमा केनले गोल गर्दै भ्रमणकारी टोलीलाई अग्रता दिलाए ।
त्यस्तै, ५३ औं मिनेटमा ब्रायन गिलको पासमा केनले दोस्रो गोल गर्दा स्पर्स २–० ले अघि रह्यो । ६८ औं मिनेटमा दोहेर्टीले गोल गर्दा टोटनहम ३–० को आरामदायी अवस्थामा पुग्यो ।
यता, सनले ७२ औं मानेटमा अर्को गोल थप्दा टोटनहमले खेल ४–० को फाराकिलो अन्तरले जित्यो ।
जितसंगै टोटनहमले १८ खेलमा ३३ अंक जोडेको छ । टोटनहम लिग तालिकाको पाँचौं स्थानमा छ । घरेलु टोली क्रिस्टल प्यालेस १७ खेलमा २२ अंककका साथ १२ औं स्थानमा छ ।
गयराति नै भएको अन्य खेलमा एस्टनभिल्ला र उल्भ्सले १–१ को बराबरी खेल्दा साउटह्याम्टन नटिङ्घम फोरेस्टसंग १–० ले पराजित भएको छ ।
त्यस्तै लिड्स युनाइटेड र वेस्टह्याम युनाइटेडबीचको खेल पनि २–२ को बराबरीमा सकिएको छ ।
लेखक
