भक्तपुर । त्रिभुवन आर्मी क्लबले प्रधानमन्त्री कप एकदिवसिय राष्ट्रिय प्रतियोगिताअन्तर्गत खेलमा कोशी प्रदेशमाथि सहज जित हासिल गरेको छ ।
विहिवार भएको मुलपानी क्रिकेट मैदानमा भएको खेलमा विभागिय त्रिभुवन आर्मी क्लबले कोशी प्रदेशमाथि ९ विकेटको सहज जित हासिल गरेको हो ।
८९ रनको सामान्य विजयी लक्ष्यका साथ जवाफी ब्याटिङमा उत्रिएको आर्मी क्लबले ९.५ ओभरमा मात्र १ विकेट गुमाउँदै ९२ रन जोड्दै जित निकाल्यो ।
आर्मीका लागि सन्तोष कार्कीले २७ बलमा ६ चौका र १ छक्का प्रहार गर्दै ३२ रन जोडेर अविजित रहँदा इमरान शेखले २५ बल खेल्दै ५ चौका र १ छक्का प्रहार गरेर ३२ रन जोड्दै आउट भए ।
यता, कुशल मल्लले मात्र ७ बलमा ४ चौका र १ छक्का प्रहार गर्दै २२ रन जोड्दै अविजित रहे ।
आर्मीले अतिरिक्त रुपमा ६ रन जोड्यो ।
कोशीका लागि एकमात्र विकेट सुजन थपलियाले लिए ।
त्यसअघि टस हारेर पहिला ब्याटिङमा उत्रिएको कोशी प्रदेशले २४.४ ओभरमा अलआउट हुँदै ८८ रन जोड्यो ।
कोशीका लागि कप्तान अंकित सुबेदीले ३७ बलमा ९ चौका प्रहार गर्दै ४१ रन जोड्दा अन्य कुनै पनि ब्याट्सम्यानले दोहोरो अंकमा रन जोड्न सकेनन् ।
कोशीका सुजन थपलिया ८, समिर कार्की र सुहान गहतराज समान ६–६ र फिर्दोष अन्सरी ४ रनमा आउट भए ।
आर्मीका लागि शाहब आलमले सर्वाधिक ६ विकेट लिँदा कुशल मल्लले २ विकेट लिए ।
त्यस्तै, सोमपाल कामी र विवेक यादवले १–१ विकेट लिए ।
लेखक
