एजेन्सी । दक्षिण अमेरिकी महादेशको शीर्ष प्रतियोगिता कोनमेबल कोपा अमेरिकाको क्वाटरफाइनल समिकरण पूरा भएको छ ।
संयुक्त राज्य अमेरिकामा जारी प्रतियोगिताको समूह चरणका खेलहरु सकिँएसंगै क्वाटरफाइनल समिकरण पूरा भएको हो ।
४८ औं संस्करणको कोपा अमेरिकामा दक्षिण अमेरिका महादेशबाट १० र उत्तर अमेरिका महादेशबाट ६ राष्ट्र गरि कुल १६ राष्ट्र सहभागी रहेको छ ।
दक्षिण अमेरिकी शीर्ष फुटबल निकाय कोनमेबल र उत्तर अमेरिकी शीर्ष निकाय कन्काफको रणनैतिक साझेदारीअन्तर्गत ६ उत्तर अमेरिकी राष्ट्रहरु पनि कोपा अमेरिकामा सहभागी भएको हो ।
समूह चरणमा ४ समूहबाट प्रत्येक समूहको विजेता र उपविजेता टोलीले नकआउट चरणमा स्थान बनायो ।
समूह ‘ए’ बाट साविक विजेता अर्जेन्टिना र क्यानडा, समूह ‘बी’ बाट भेनेजुएला र इक्वेडर, समूह ‘सी’ बाट उरुग्वे र पानामा तथा समूह ‘डी’ बाट कोलम्बिया र ब्राजिल अघिल्लो चरणमा प्रवेश गरे ।
समूह चरणबाट बाहिरिने राष्ट्रहरुमा चिल्ली, पेरु, मेक्सिको, जमैका, अमेरिका, बोलिभिया, कोस्टारिका र पाराग्वे रहेका छन् ।
अब क्वाटरफाइनलका खेलहरु शुक्रवार विहानदेखि सुरु हुने तालिका रहेको छ ।
क्वाटरफाइनलका खेलहरु निर्धारित ९० मिनेट खेलाइनेछ । निर्धारित समयमा पनि खेलको नतिजा नआए सिधै पेनाल्टी सुटआउटमार्फत नतिजाको छिनोफानो हुनेछ ।
पहिलो क्वाटरफाइनल खेलमा उपाधि रक्षा अभियानमा रहेको अर्जेन्टिना र इक्वेडर खेल्दैछ ।
लेखक
