एजेन्सी । अमेरिकी क्लब इन्टर मियामी अमेरिकी महादेशिय प्रतियोगिता कन्काफ च्याम्पियन्स कपअन्तर्गत क्वाटरफाइनलको पहिलो लेग खेलमा पराजित भएको छ ।
विहिवार विहान भएको क्वाटरफाइनलअन्तर्गत पहिलो लेग खेलमा कप्तान लियोनल मेसीबिना मैदान उत्रिएको इन्टर मियामी मेक्सिकन क्लब मोनटेरीसंग २–१ ले पराजित भएको हो ।
मियामीको घरेलु मैदान चेस रंगशालामा भएको खेलमा भ्रमणकारी टोलीको जितमा म्याक्सिमिलिनाओ मेजा र जोर्गे राड्रिगुएजले गोल गरे ।
घरेलु टोलीका लागि भने टोमस अभिलेसले गोल गरे ।
खेल सुरु भएको १९ औं मिनेटमा जुलियान ग्रिस्सेलको पासमा टोमसले गोल गर्दै घरेलु टोलीलाई सुरुवाती अग्रता दिलाए ।
तर, दोस्रो हाफको ६५ औं मिनेटमा डेभिड रुइजले दोहोरो पँहेलो कार्ड खाँदै मैदानबाट बाहिरिदा घरेलु टोली १० खेलाडीमा समेतियो ।
जसको भरपुर फाइदा भ्रमणकारी टोलीले उठायो ।
६९ औं मिनेटमा मेजाले मेक्सिकन टोलीका लागि गोल फर्काउँदा खेल १–१ को बराबरीमा आयो ।
त्यसपछि ८९ औं मिनेटमा मेजाकै पासमा राड्रिगुएजले गोल थप्दा मेक्सिकन टोली २–१ ले विजयी भयो ।
लेखक
