भक्तपुर । कतारमा जारी फिफा विश्वकपको तेस्रो स्थानका लागि भएको प्ले आफ खेलमा मोरक्कोमाथि जित रोमाञ्चक जित हात पार्दै क्रोएसिया तेस्रो हुन सफल भएको छ ।
सनिवार राति भएको खेलमा साविक उपविजेतासमेत रहेको क्रोएसियाले उत्तर अफ्रिकी राष्ट्र मोरक्कोमाथि २–१ को रोमाञ्चक जित हात पारेको हो ।
खालिफा अन्तराष्ट्रिय रंगशालामा खेलको सातौं मिनेटमा क्रोएसियाले अग्रता लिएको थियो । इभान परिसिकको असिस्टमा जोस्को ग्भारदिओलले अकर्षक गोल गर्दै युरोपेली राष्ट्रलाई १–० को अग्रता दिलाएका थिए ।
तर, त्यसको दुई मिनेटमै मोरक्को खेलमा फर्कियो । क्रोएसियाले फाउल गरेपछि प्राप्त फ्रिकिकलाई हाकिम जियाचको प्रहार क्रोएसियाको वालमा बसेको खेलाडीमा डिफ्लेक्ट हुँदै आचरिफ दारीले भेटाएपछि हेडर गोल गर्दै खेललाई १–१ को बराबरीमा ल्याएका थिए ।
रोमाञ्चक खेलको ४२ औं मिनेटमा मिस्लाभ ओरसिकले आकर्षक गोल गर्दा खेलमा क्रोएसिया फेरी एकपटक २–१ ले अगाडी बढ्यो ।
त्यसपछि दोस्रो हाफमा दुबै टोलीले गोलका राम्रा केहि अवसर सदुपयोग गर्न नसक्दा खेल २–१ ले सकियो ।
एसियाली राष्ट्र कतारमा जारी विश्वकपमा क्रोएसियाले सुखद अन्त्य गर्दा मोरक्कोले पनि इतिहासमै पहिलोपल्ट सेमिफाइनलसम्मको यात्रा तय गरेरे गर्वका साथ घर फर्कने भएको छ ।
लेखक
