भक्तपुर । एसियाली राष्ट्र कतारमा जारी फिफा विश्वकपको उपाधिका लागि अर्जेन्टिना र फ्रान्स आइतवार राति प्रतिस्पर्धामा उत्रिदैछ ।
लुसाईल आइकोनिक रंगशालामा नेपाली समय अनुसार राति पौने ९ बजे उपाधि भिडन्त सुरु हुनेछ ।
जारी विश्वकपमा अर्जेन्टिनाले क्रोएसिया र फ्रान्सले मोरक्कोमाथि जित हात पार्दै उपाधि भिडन्त पक्का गरेको हो ।
यसअघि यी दुई राष्ट्र अघिल्लो संस्करणको रसिया विश्वकपमा प्रतिस्पर्धा गरेका थिए । नकआउट चरणको उक्त प्रतिस्पर्धामा फ्रान्स ४–३ ले विजयी रहेको थियो ।
तर, आज उपाधि भिडन्तमा यी दुई राष्ट्र आमनेसामने हुँदैगर्दा अवस्था केहि फेरिएको छ ।
अर्जेन्टिना लियोनल मेसीको कप्तानीमा बलियो र एक जुट देखिरहँदा फ्रान्सलाई भने फ्लुले सताएको छ ।
फ्रान्सका महत्वपूर्ण सदस्य भरान लगायत फ्लु ग्रसित भएको समाचार बाहिरिएको छ । यस्तोमा साविक विजेता राष्ट्रलाई उपाधि रक्षा अभियानको अन्तिम खेलमा थोरै चिन्ता थपिएको हुन सक्छ ।
तर केलियन एम्बाप्पे, एन्टोनी ग्रीजमन जस्ता विश्व स्तरिय खेलाडीले कुनैपनि समय खेललाई फ्रान्सेली पक्षमा परिर्वतन गराउन सक्छ ।
अहिलेसम्म यी दुई राष्ट्रले दुई–दुईपटक विश्वकप उपाधि उचालिसकेको छ । अर्जेन्टिनाले पछिल्लोपटक सन् १९८६ मा विश्व फुटबलको सर्वोच्च उपाधि उचाल्दा फ्रान्सले पछिल्लोपटक सन् २०१८ को विश्वकप उचालेको थियो ।
वर्तमान फुटबलका सर्वकृष्ट खेलाडी लियोनल मेसीले सम्भवतः अन्तिम विश्वकप खेलिरहँदा २२ औं संस्करणको विश्वकप उपाधि उचाल्न हरसम्भव प्रयास गर्नेछ । यता, उसलाई रोक्दैै उपाधि रक्षा गर्ने फ्रान्सको दाउ हुनेछ ।
फाइनल खेल धेरै अर्थमा रोमाञ्चक हुने आकलन गर्न सकिन्छ ।
लेखक
