एजेन्सी । आईसीसी टि–२० विश्वकपअन्तर्गत पहिलो खेलमा उपाधि दाबेदार अष्ट्रेलियाले ओमानमाथि सहज जित निकालेको छ ।
विहिवार विहान भएको दोस्रो खेलमा बलियो टेस्ट राष्ट्र अष्ट्रेलियाले एसोसियट राष्ट्र ओमानमाथि ३९ रनको सहज जित निकालेको हो ।
सहज जितसंगै समूह ‘बी’ मा रहेको अष्ट्रेलियाले महत्वपूर्ण २ अंक जोड्दै तालिकाको शीर्ष स्थानमा उक्लिएको छ ।
वेस्ट इन्डिजको बारबाडोसस्थित केनसिङटोन ओभल रंगशालामा भएको खेलमा १६५ रनको विजयी लक्ष्य पछ्याएको ओमानले निर्धारित २० ओभरको इनिङ्स खेल्नेक्रममा ९ विकेट गुमाउँदै १२५ रन जोड्यो ।
बलियो राष्ट्रविरुद्व राम्रो प्रदर्शन देखाएको एसोसियट राष्ट्र ओमानका लागि आयान खानले ३० बलमा २ चौका र २ छक्का प्रहार गर्दै ३६ रन जोडेर आउट हुँदा मेहरान खानले १६ बल खेल्दै १ चौका र २ छक्का प्रहार गर्दै २७ रन जोडेर पेविलियन फर्किए ।
त्यस्तै, कप्तान अकिब इलियासले १८ बलमा २ चौका र १ छक्का प्रहार गर्दै १८ रन जोडेर आउट हुँदा शकिल अहमदले १० बल खेल्नेक्रममा १ चौका प्रहार गर्दै ११ रन जोडेर पेविलियन फर्किए ।
यता, ओपनर ब्याट्सम्यान कश्यप प्रजापति ७, खालिद काइल ८ र जिशान मकशुद १ रनमा आउट हुँदा ओमानका अन्य २ ब्याट्सम्यान अंकको खाता नै नखोली पेविलयन फर्किए ।
कालेम्मुलाह ६ र बिलाल खान १ रनमा अविजित रहे ।
ओमानले अतिरिक्त रुपमा १० रन जोड्यो ।
ओमानमाथि सहज जित निकाल्न अष्ट्रेलियाका लागि मार्कुस स्टोइनिसले ३ विकेट लिँदा मिट्चेल स्टार्क, नाथान इलिस र एडम जाम्पाले समान २–२ विकेट लिए ।
त्यसअघि टस हारेर पहिला ब्याटिङमा उत्रिएको अष्ट्रेलियाले निर्धारित २० ओभरको खेलमा ५ विकेट गुमाउँदै १६४ रन जोड्यो ।
अष्ट्रेलियाका लागि मार्कुस स्टोइनिसले ३६ बलमा २ चौका र ६ छक्का प्रहार गर्दै ६७ रनको अर्धशतकिय पारी खेल्दै अविजित रहँदा ओपनर ब्याट्सम्यान डेभिड वार्नरले ५१ बल खेल्नेक्रममा ६ चौका र १ छक्का प्रहार गर्दै ५६ रनको अर्धशतकिय पारी खेल्दै पेविलियन फर्किए ।
त्यस्तै, मिट्चेल मार्शले २१ बलमा २ चौका प्रहार गर्दै १४ रन जोडेर आउट हुँदा ट्राभिस हेडले १० बल खेल्दै २ चौका प्रहार गरेर १२ रन जोडेर पेविलियन फर्किए ।
टिम डेभेड ९ रनमा रनआउट हुँदा ग्लिन म्याक्सवेल शुन्य रनमा पेविलियन फर्किए ।
अष्ट्रेलियाले अतिरिक्त रुपमा ६ रन जोड्यो ।
ओमानका लागि मेहरान खानले ४ ओभर बलिङ गर्दा ३८ रन दिएर २ विकेट लिँदा बिलाल खान र कालेमुल्लाहले १–१ विकेट लिए ।
लेखक
