एजेन्सी । अफगानिस्तानले एकदिवसिय अन्तर्राष्ट्रिय (ओडिआई) सिरिजमा दक्षिण अफ्रिकालाई पराजित गरेको छ ।
बुधवार राति भएको खेलमा एसियाली राष्ट्र अफगानिस्तानले तुलनात्मक रुपमा बलियो प्रतिद्वन्दी दक्षिण अफ्रिकालाई ६ विकेटले पराजित गरेको हो ।
ऐतिहासिक जितसंगै अफगानिस्तानले तीन खेलको सिरिजमा १–० को अग्रता लिएको छ ।
युएईको सारजाहस्थित सारजाह क्रिकेट रंगशालामा भएको खेलमा १०७ रनको सामान्य विजयी लक्ष्य अफगानिस्तानले २६ ओभर खेल्नेक्रममा ४ विकेट गुमाउँदै पूरा गर्यो ।
अफगानिस्तानको जितमा गुलबदिन नाइबले २७ बलमा ३ चौका र २ छक्का प्रहार गर्दै ३४ रन जोडेर अविजित रहँदा अजमतुल्लाह ओमारजाइले २६ बल खेल्दै २ छक्का प्रहार गरेर २५ रन जोडेर अविजित रहे ।
त्यस्तै, कप्तान हश्मतुल्लाह शाहिदीले २९ बलमा १ चौका प्रहार गर्दै १६ रन जोडेर आउट हुँदा ओपनर ब्याट्सम्यान रियाज हस्सनले ३५ बल खेल्नेक्रममा २ चौका प्रहार गर्दै १६ रन जोडेर पेविलियन फर्किए ।
यता, रहमत शाह ८ रनमा आउट हुँदा अर्का ओपनर तथा विकेटकिपर रहमानुल्लाह गुरबाज भने शुन्य रनमा पेविलियन फर्किए ।
अफगानिस्तानले अतिरिक्त रुपमा ८ रन जोड्यो ।
दक्षिण अफ्रिकाका लागि बिजोर्न फर्चुनले २ विकेट लिँदा एडैन मार्कराम र लुङ्गी एनगिडीले समान १–१ विकेट लिए ।
त्यसअघि टस जितेर पहिला ब्याटिङमा उत्रिएको दक्षिण अफ्रिकाले ३३.३ ओभरमा अलआउट हुँदै मात्र १०६ रन जोड्यो ।
दक्षिण अफ्रिकाका लागि वियान मुल्डरले ८४ बलमा ५ चौका र १ छक्का प्रहार गर्दै सर्वाधिक ५२ रनको अर्धशतकिय पारी खेल्दा बिजोर्न फर्चुनले ३४ बल खेल्दै २ चौका प्रहार गरेर १६ रन जोडेर पेविलियन फर्किए ।
त्यस्तै, ओपनर ब्याट्सम्यान टोनी डि जोर्जीले १८ बलमा १ चौका प्रहार गर्दै ११ रन जोडेर आउट हुँदा विकेटकिपर केयल भिरेन्नेले ११ बल खेल्नेक्रममा २ चौका प्रहार गर्दै १० रन जोडेर पेविलियन फर्किए ।
यता, अर्का ओपनर रिजा हेनड्रिक्स ९ र कप्तान एडेन मार्कराम २ रनमा आउट हुँदा अन्य ४ ब्याटर शुन्य रनमा पेविलियन फर्किए ।
नान्ड्रे बर्गर भने १ रनमा अविजित रहे ।
दक्षिण अफ्रिकाले अतिरिक्त रुपमा ५ रन जोड्यो ।
अफ्रिकाको ब्याटरहरुलाई धराशायी पार्न अफगानिस्तानका लागि फजलहक फारुकीले सर्वाधिक ४ विकेट लिँदा अल्लाह घजनफरले ३ र राशिद खानले २ विकेट लिए ।
लेखक
