एजेन्सी । जारी सिजन खराब लयबाट गुज्रिरहेको चेल्सीले इंग्लिस फुटबलको प्रतिष्ठित प्रतियोगिता एफए कपअन्तर्गत खेलमा एस्टन भिल्लामाथि सहज जित निकालेको छ ।
बुधवार राति भएको चौथौं चरण चरणअन्तर्गत रिपिट खेलमा लण्डन क्लब चेल्सीले प्रिमियर लिग प्रतिद्वन्दी एस्टन भिल्लामाथि ३–१ को सहज जित निकालेको हो ।
एस्टन भिल्लाको घरेलु मैदान भिल्ला पार्क रंगशालामा भएको खेलमा चेल्सीको जितमा कोनोर गालाघर, निकोलास ज्याक्सन र इन्जो फर्नान्डेजले गोल गरे ।
उता, घरेलु टोलीका लागि मौस्सा ड्याबेले सान्तोना गोल फर्काए ।
खेल सुरु भएको ११ औं मिनेटमा नोनी माद्वेकेको पासमा गालाघरले गोल गर्दै चेल्सीलाई सुरुवाती अग्रता दिलाए ।
त्यसपछि २१ औं मिनेटमा मालो गुस्टोको असिस्टमा ज्याकसनले गोल थप्दा चेल्सी २–० ले अघि बढ्यो ।
यता, दोस्रो हाफको ५४ औं मिनेटमा फ्रिकिकमार्फत् फर्नान्डेजले दर्शनिय गोल थप्दा चेल्सी ३–० को आरामदायी अग्रतातर्फ लम्कियो ।
उता, खेलको अन्त्यतिर इन्जुरी समयको पहिलो मिनेटमा घरेलु टोलीका लागि जाकोब रामसेको असिस्टमा ड्याबेले सान्तोना गोल फर्काउँदा खेल ३–१ ले सकियो ।
सहज जितसंगै चेल्सी एफए कपको पाँचौं चरण प्रवेश गरेको छ ।
पराजित एस्टन भिल्ला भने प्रतियोगिताबाट बाहिरिएको छ ।
गयराति नै भएको अर्को खेलमा प्रिमियर लिग क्लब नटिङघम फोरेस्टले च्याम्पियनसिप क्लब बिस्टोल सिटीमाथि ट्राइब्रेकरमा ५–३ को जित निकालेको छ ।
निर्धारित ९० मिनेटको खेलमा १–१ को बराबरीमा सकिएसंगै खेलको निर्णय ट्राइब्रेकरमार्फत् लिइएको हो ।
ट्राइब्रेकरमा विजयी भएसंगै फोरेस्ट अघिल्लो चरण प्रवेश गरेको छ ।
लेखक
