भक्तपुर । जारी फिफा विश्वकपको बुधवार राति भएको दुबै खेलमा एसियाली राष्ट्रहरु पराजित भएसंगै एसियाली महादेशको विश्वकप यात्रा टुंगिएको छ ।
दोस्रो चरणको खेलमा एसियाका तीनै राष्ट्रले पराजय बेहोरेसंगै विश्व फुटबलको सर्वाधिक लोकप्रियबाट एसिया बहिरिएको हो ।
गयरातिको दोस्रो तथा अन्तिम खेलमा उपाधि दाबेदार राष्ट्र ब्राजिलले दक्षिण कोरियामाथि ४–१ को फाराकिलो जित निकालेसंगै एसियाली राष्ट्रहरु एसियामै भईरहेको विश्वकपबाट बाहिरिएको हो ।
३२ राष्ट्रको सहभागिता रहेको यो पालीको विश्वकपमा ६ एसियाली राष्ट्रहरुको सहभागिता थियो । आयोजक राष्ट्र कतारसंगै इस्लामिक राज्य इरान, साउदी अरबिया, अस्ट्रेलिया, जापान र दक्षिण कोरिया एसिया महादेशबाट सहभागी थिए ।
यसअघि समूह चरणबाटै आयोजक कतार, इरान र साउदी अरबिया बाहिरिएका थिए । बाँकी तीन राष्ट्रहरुले दोस्रो चरण तय गर्दा क्वाटरफाइनल भने प्रवेश गर्न सकेन ।
अस्ट्रेलिया अर्जेन्टिनासंग २–१ ले पराजित रहँदा जापान साविक उपविजेता क्रोएसियासंग पेनाल्टी सुटआउटमा पराजित रहे । त्यस्तै, दक्षिण कोरिया पनि बलियो ब्राजिलसंग पराजित रहे ।
पराजयसंगै तीनवटै राष्ट्र अन्तिम १६ बाटै घर फर्कन बाध्य बन्यो । योसंगै एसियाली राष्ट्रहरुले कतार विश्वकप यात्रा टुंग्याएको छ ।
एसियाली राष्ट्रले विश्वकप जित्ने सपना अब कम्तीमा पनि सन् २०२६ सम्मका लागि टाढिएको छ ।
लेखक
