भक्तपुर । एसियाली क्रिकेटको सर्वोच्च प्रतियोगिता एसीसी एसिया कपमा पहिलोपल्ट सहभागिता जनाउन गइरहेको नेपालले भोली अर्थात् बुधवार विश्व नम्बर एक राष्ट्र पाकिस्तानसंग खेल्दै डेब्यु गर्दैछ ।
पाकिस्तान र श्रीलंकाले संयुक्त रुपमा आयोजना गर्न गइरहेको १६ औं संस्करणको एसिया कपमा नेपालले उपाधि दावेदार राष्ट्र पाकिस्तानसंग खेल्दै प्रतियोगितामा डेब्यु गर्ने भएको हो ।
खेल पाकिस्तानस्थित मुल्तान रंगशालामा नेपाली समय अनुसार दिउँसो पौने चार बजे सुरु हुनेछ ।
एकदिवसिय अन्तराष्ट्रिय (ओडिआई) ढाँचामा हुने प्रतियोगितामा नेपालसहित पाकिस्तान, श्रीलंका, भारत, बंगलादेश र अफगानिस्तान गरि ६ राष्ट्रको सहभागिता रहनेछ ।
प्रतियोगितामा नेपाल एकमात्र एसोसियट राष्ट्र हो । बाँकी पाँचै राष्ट्र टेस्ट मान्यता भएका राष्ट्रहरु हुन् ।
समूह ‘ए’ मा रहेको नेपालले ओडिआई वरियतामा शीर्ष स्थानमा रहेको पाकिस्तान र तेस्रो स्थानमा रहेको भारतसंग समूह चरणमा प्रतिस्पर्धा गर्नेछ ।
यस्तोमा विश्व क्रिकेटको शक्तिशाली राष्ट्रहरुसंगै खेल्न पाउनु नेपालका लागि सुवर्ण अवसर समेत हो ।
नेपालले प्रतियोगितामा नतिजाको लागि भन्दा पनि अनुभवका खेल्ने पक्का छ ।
एकदिवसिय विश्वकपको तयारीका रुपमा उपाधि दावेदार भारत र पाकिस्तानले एसिया कपलाई उपयोग गर्ने पक्का हुँदा नेपालले भने उत्सवका रुपमा खेल्ने तयारी गरेको छ ।
नेपालले प्रतियोगिताअन्तर्गत दोस्रो खेल भने सेप्टेम्बर ४ तारिख अर्थात् भदौ १८ गते सोमवार श्रीलंकामा खेल्नेछ ।
गत बैशाखमा नेपालमा भएको एसीसी प्रिमियर कप जित्दै नेपाल एसिया कपका लागि छनोट भएको थियो ।
लेखक
