एजेन्सी । कतारमा जारी एएफसी एसियन कपअन्तर्गत समूह ‘डी’ को खेलमा जापानले इन्डोनेसियामाथि सहज जित हासिल गरेको छ ।
बुधवार भएको समूह ‘डी’ अन्तर्गत पहिलो खेलमा एसियाली पावर हाउस जापानले इन्डोनेसियामाथि ३–१ को जित हासिल गरेको हो ।
अल थुमामा रंगशालामा भएको खेलमा जापानको जितमा अयासे वेदाले दुई गोल गर्दा अर्को गोल इन्डोनेसियाका जस्टिन हुबनेरको आत्मघाती मार्फत् प्राप्त भयो ।
यता, इन्डोनेसियाका लागि सान्डे वाल्सले सान्तोना गोल फर्काए ।
जापानका लागि अघिल्लो चरण प्रवेश सहज बनाउँन जित्नै पर्ने खेलमा छैटौं मिनेटमा वेदाले पेनाल्टीमार्फत् गोल गर्दै जापानलाई सुरुवाती अग्रता दिलायो ।
त्यसपछि दोस्रो हाफको ५२ औं मिनेटमा रित्सु दोआनको असिस्टमा वेदले व्यक्तिगत रुपमा दोस्रो गोल गर्दा जापान २–० ले अघि बढ्यो ।
रोमाञ्चक खेलको ८८ औं मिनेटमा इन्डोनेसियाका जस्टिनले आत्मघाती गोल गर्दा जापान ३–० ले अघि बढ्यो ।
त्यसको तीन मिनेटपछि नै सान्डेले इन्डोनेसियाका लागि सान्तोना गोल फर्काउँदा खेल ३–१ ले सकियो ।
सहज जितसंगै एसियाको सर्वाधिक सफल राष्ट्र जापानले समूह चरणमा दुई खेलमा जित र एकमा हारको नतिजाका साथ ६ अंक जोड्दै समूह उपविजेताका रुपमा अघिल्लो चरण प्रवेश गर्यो ।
उता, इन्डोनेसिया भने समूह चरणमा एक खेलमा जित र दुईमा हार बेहोर्दै ३ अंकका साथ समूह तालिकाको तेस्रो स्थानमा रह्यो ।
जस्सिम बिन हमद रंगशालामा भएको समूह ‘डी’ कै अर्को खेलमा इराकले १० खेलाडीमा समेतिएको भियतनाममाथि ३–२ को प्रतिस्पर्धात्मक जित निकाल्यो ।
खेलको ४२ औं मिनेटमा खुवाट भान खाङको असिस्टमा बुइ होआङ भेइट अहले गोल गर्दै भियतनामलाई सुरुवाती अग्रता दिलाए ।
यता, पहिलो हाफको इन्जुरी समयमा खुवाट भान खाङले दोहोरो पँहेलो कार्ड खाँदा भियतनाम १० खेलाडीमा समेतियो ।
्दोस्रो हाफको ४७ औं मिनेटमा इराकका अली जसिमको पासमा रेबिन सोलाकाले गोल फर्काउँदा खेल १–१ को बराबरीमा आयो ।
त्यसपछि ७३ औं मिनेटमा अली जसिमकै पासमा आमेन हुसेनले गोल थप्दा इराक खेलमा २–१ ले अघि बढ्यो ।
यता, ८३ औं मिनेटमा आमेन हुसेन पेनाल्टीमा चुक्दा इराक अग्रता बढाउन चुक्यो ।
निर्धारित ९० मिनेटपछि थपिएको इन्जुरी समयको पहिलो मिनेटमा भियतनामका एनगुएन क्वाङ हाईले गोल फर्काउँदा खेल २–२ को बराबरीमा आयो ।
त्यसपछि इन्जुरी समयको १२ औं मिनेटमा आमेन हुसेनले पेनाल्टीमार्फत् गोल गर्दा इराक ३–२ ले विजयी भयो ।
प्रतिस्पर्धात्मक जितसंगै इराकले समूह चरणमा शतप्रतिशत जित निकाल्दै ९ अंकका साथ समूह विजेता बन्दै अन्तिम १६ मा प्रवेश गरेको छ ।
भियतनामले भने समूह चरणका सबै खेलमा हार बेहोर्दै समूह तालिकाको पुच्छारमा रहँदै प्रतियोगिताबाट बिदा भएको छ ।
लेखक
