एजेन्सी । एसियाली फुटबलको शीर्ष प्रतियोगिता एएफसी एसियन कपन्तर्गत उद्घाटन खेलमा आयोजक राष्ट्र कतारले लेबनानमाथि सहज जित हासिल गरेको छ ।
शुक्रवार राति भएको खेलमा साविक विजेतासमेत रहेको कतारले लेवनानलाई ३–० को सहज जित हासिल गरेको हो ।
कतारस्थित लुसाइल रंगशालामा भएको खेलमा घरेलु टोलीका लागि अक्राम आफिफले दुई गोल गर्दा अलमोएज अलीले अर्को एक गोल थपे ।
पहिलो हाफको अन्त्यतिर ४५ औं मिनेटमा अल्मोएज अलीको पासमा अक्रमले गोल गर्दै घरेलु टोलीलाई सुरुवाती अग्रता दिलाए ।
त्यसपछि दोस्रो हाफको ५६ औं मिनेटमा मोहम्मेद वादको पासमा अलीले गोल थप्दा कतार २–० ले अघि बढ्यो ।
यता, खेलको अन्त्यतिर इन्जुरी समयको छैटौं मिनेटमा अक्रमले व्यक्तिगत रुपमा दोस्रो गोल थप्दा कतार ३–० ले विजयी भयो ।
सहज जितसंगै समूह ‘ए’ मा रहेको कतारले ३ अंक जोडेको छ ।
लेखक
