एजेन्सी । स्पेनिस ला लिगाअन्तर्गत एलक्लासिको भिडन्तमा रियल मड्रिडले प्रतिस्पर्धात्मक जित हासिल गरेको छ ।
आईतवार राति भएको स्पेनिस महारथीद्वयबीचको रोमाञ्चक खेलमा लिग लिडर रियल मड्रिडले साविक विजेता बार्सिलोनामाथि ३–२ को प्रतिस्पर्धात्मक जित हासिल गरेको हो ।
मड्रिडको घरेलु मैदान स्यान्टियागो बेर्नाबाउ रंगशालामा भएको खेलमा घरेलु टोलीको जितमा भिनिसियस जुनियर, लुकास भाजक्वेज र जुधे बेलिङघमले गोल गरे ।
भ्रमणकारी टोलीका लागि एन्ड्रेस क्रिस्टियन्सन र फेर्मिनले गोल गरे ।
एलक्लासिको सुरु भएको छैटौं मिनेटमा राफिन्हाको पासमा क्रिस्टियन्सनले गोल गर्दै क्याटलान क्लबलाई सुरुवाती अग्रता दिलाए ।
तर, १८ औं मिनेटमा भिनिसियस जुनियरले पेनाल्टीमार्फत् गोल फर्काउँदा खेल १–१ को बराबरीमा आयो ।
त्यसपछि दोस्रो हाफको ६९ औं मिनेटमा फेर्मेनले गोल थर्दै पुनः बार्सिलोनालाई २–१ ले अघि बढायो ।
तर, ७३ औं मिनेटमा भिनिसियस जुनियरको पासमा भाजक्वेजले बराबरी गोल फर्काउँदा खेल २–२ को बराबरीमा आयो ।
यता, बराबरी उन्मुख खेलको अन्त्यतिर इन्जुरी समयको पहिलो मिनेटमा भाजक्वेजको पासमा बेलिङघमले गोल गर्दै मड्रिडलाई ३–२ ले जिताए ।
प्रतिस्पर्धात्मक जितसंगै लिग लिडर मड्रिडले ३२ खेलबाट ८१ अंक जोडेको छ ।
पराजित बार्सिलोनाको भने समान ३२ खेलबाट ७० अंकसहित तालिकाको दोस्रो स्थानमा छ ।
योसंगै निकतम प्रतिद्वन्दी बार्सिलोनासंग ११ अंकको फराकिलो अग्रता बनाएको मड्रिड ला लिगाको उपाधि नजिक पुगेको छ ।
लेखक
