
भक्तपुर । अखिल नेपाल फुटबल संघ (एन्फा) ले नेपाली राष्ट्रिय फुटबल टिमका नवनियुक्त मुख्य प्रशिक्षक भिन्सेन्जो अल्बर्टो एनिसलाई आधिकारिक रुपमा सार्वजनिक गरेको छ ।
मंगलवार त्रिपुरेश्वरस्थित दशरथ रंगशालामा नवनियुक्त प्रशिक्षकलाई सार्वजनिक गरेको हो ।
यूईएफएको प्रो लाइसेन प्राप्त ३८ वर्षिय इटालियन प्रशिक्षकले नयाँ खेलाडीलाई मौका प्रदान गर्दै नयाँ रणनीतिका साथ खेल्ने बताउनु भएको छ ।
‘यदि कुनै खेलाडी एमेच्योर फुटबल खेल्छ भने मैले उसको खेल हेर्न पाउँदिन र उनीहरूको वास्तविक अवस्था बुझ्न सक्दिनँ। त्यसैले मैले आफूले खेल हेरेका खेलाडीलाई टिममा मौका दिनेछु,’ भिन्सेन्जोले बताए ।
उनले नेपाली फुटबललाई केहि वर्षयता नियालिरहेको बताउदै नेपाली युवा खेलाडीमा क्षमता भएपनि उनीहरूमा अनुभवको कमि रहेको बताए ।
‘म युवा जोशिला खेलाडीमा विश्वास गर्छु । नेपालमा क्षमतावान युवा खेलाडी छन् र उनीहरूमा केवल अनुभवको कमी छ,’ उनले थपे ।
नयाँ प्रशिक्षकको नेतृत्वमा नेपालले चैत्र ८ गतेदेखि १७ गतेसम्म चल्ने प्रधानमन्त्री कप थ्री नेसन्स कप खेल्दैछ ।
त्रिपुरेश्वरस्थित दशरथ रंगशालामा आयोजना हुने प्रतियोगितामा नेपालसंगै भुटान र लाओसले राउण्ड राविन लिगका आधारमा प्रतिस्पर्धा गर्नेछ ।