भक्तपुर । नेपाली क्रिकेटको शीर्ष टि–२० फ्रेन्चाइज प्रतियोगिता नेपाल प्रिमियर लिग (एनपिएल) सम्पन्न भएको छ ।
सनिवार काठमाडौंको क्रितिपुरस्थित टियु क्रिकेट मैदानमा फाइनल खेल सकिएसंगै पहिलो संस्करणको एनपिएल सम्पन्न भएको हो ।
कुल ८ फ्रान्चाइज टोलीको सहभागिता रहेको प्रतियोगिता जनकपुर बोल्ट्सले जितेको छ ।
जनकपुरले फाइनल खेलमा चिरपरिचित प्रतिद्वन्दी सुदुरपश्चिम रोयल्सलाई ५ विकेटले पराजित गर्दै ऐतिहासिक उद्घाटन सिजनको उपाधि जित्न सफल भयो ।
उपाधिसंगै जनकपुरले नगद १ करोड १० लाख रुपैया जितेको छ ।
त्यसअघि लिग चरण र प्लेअफको खेलमा गरी दुईपल्ट सुदुरपश्चिमसंग बेहोरेको हारको बदला पनि जनकपुरले लियो ।
फाइनल खेलमा पराजय बेहोरेको सुदुरपश्चिम भने प्रतियोगिताको उपविजेतामा सिमित रह्यो ।
सुदुरले नगद ५१ लाख रुपैया जितेका छन् ।
यता, प्रतियोगिताको तेस्रो स्थान हासिल गर्न सफल कर्णाली याक्सले २५ लाख र चौथौं भएको चितवन राइनोजले १५ लाख रुपैया जितेका छन् ।
लुम्बीनी लायन्सले भने फेयर प्ले अवार्ड जितेको छ ।
प्रतियोगिताको व्यक्तिगत विधातर्फ सर्वोत्कृष्ट नेपाली खेलाडी सुदुरपश्चिमका कप्तान दिपेन्द्रसिंह ऐरी घोषित भए ।
अलराउण्डर दिपेन्द्रले प्रतियोगिता भरी २२७ रन जोड्दा ९ विकेटसमेत लिए ।
उनले करिब ६२ लाख मुल्य पर्ने अमोडा इ–५ डिएलएक्स इलेक्ट्रोनिक कार पुरस्कारमा जिते ।
त्यस्तै, सर्वोत्कृष्ट बलर जनकपुरका ललित राजवंशी घोषित भए ।
ललितले प्रतियोगितामा कुल १७ विकेट लिएका थिए ।
उनले अल्ट्राभायोलेट एफ ७७ मोटरसाइकल पुरस्कार स्वरुप जिते ।
प्रतियोगिताको उदयीमान खेलाडी भने विपिन प्रसाद शर्मा घोषित भए । उनले नगद रुपैया ५० हजार जित्नुका साथै १० लाख बराबरको छात्रवृत्ति पनि पाउन भए ।
त्यस्तै, सिद्दार्थ बैंक प्लेयर अफ द टुर्नामेन्ट सुदूरपश्चिमका सेइफ जेइब घोषित भए । उनले ५ लाख रुपैया पुरस्कार राशी जित्न सफल भयो ।
यता, इनर्जेटिक प्लेयर अफ द टुर्नामेन्टको अवार्ड भने जनकपुरका जिमी निशमले जिते । उनले २ लाख रुपैया पुरस्कार राशी हात पारे ।
प्रतियोगितामा सर्वाधिक चौका हान्ने जनकपुरका लाहिरु मिलान्थाले २ लाख रुपैयाँ पुरस्कार राशी जिते ।
फाइनल खेलको प्लेयर अफ द म्याचको अवार्ड पनि मिलान्थाले जिते ।
नेपाली क्रिकेटको सर्वोच्च निकाय नेपाल क्रिकेट संघ (क्यान) को आयोजनामा भएको प्रतियोगिता मंसिर १५ गतेदेखि पुस ६ गतेसम्म भएको हो ।
लेखक
