भक्तपुर । सहिद स्मारक ‘ए’ डिभिजन लिगमा मनाङ मर्स्याङ्दी क्लबले न्युरोड टिम (एनआरटी) माथि सहज जित निकालेको छ ।
बुधवार भएको खेलमा मनाङ मर्स्याङ्दी क्लबले न्युरोड टिम (एनआरटी) माथि ३–१ को सहज जित हात पारेको हो ।
त्रिपुरेश्वरस्थित दशरथ रंगशालामा भएको खेलमा मनाङका लागि रोशन राणामगर, साइदजामोल र कोल्फी कौदोले समान एक–एक गोल गर्दा अशोक थापाले एनआरटीका लागि एक गोल फर्काए ।
रोमाञ्चक खेलमा ३९ औं मिनेटमा रोशनको गोलमार्फत मनाङले खेलमा १–० को अग्रता बनाएको थियो ।
दोस्रो हाफको ६८ औं मिनेटमा परिर्वतित खेलाडीका रुपमा मैदान प्रवेश गरेका साइदजामोलले गोल गर्दा मनाङ २–० ले अघि बढ्यो ।
यता, ८७ औं मिनेटमा कोल्फीले तीन डिफेन्डरलाई छक्याउदै दर्शणीय गोल गर्दा मनाङ ३–० को सहज अवस्थामा अघि बढ्यो ।
निर्धारित ९० मिनेटको खेलको अतिरिक्त थपिएको ६ मिनेटको पहिलो मिनेटमा एनआरटीका अशोकले एक गोल फर्काउँदा खेल ३–१ ले सकियो ।
जितसंगै मनाङको ४ खेलमा ८ अंक भएको छ । मनाङ तालिकाको तेस्रो स्थानमा उक्लेको छ ।
त्यस्तै, पराजित एनआरटीको ४ समान खेलमा १ अंक छ । एनआरटी तालिकाको पुच्छारमा झरेको छ ।
यसअघि बुधवार नै भएको पहिलो खेलमा त्रिभुवन आर्मी फुटबल क्लबलाई १–० ले पराजित गर्दै नेपाल पुलिस क्लबले महत्वपूर्ण ३ अंक हात पारेको छ ।
च्यासल रंगशालामा भएको विभागिय डर्वीका रुपमा परिचित खेलको ३७ औं मिनेटमा मनि लामाले एकमात्र निर्णायक गोल गरेका थिए ।
जितसंगै पुलिसले ५ औं खेलमा आएर अंकको खाता खोलेका छन् । पुलिस क्लबले तालिकामा ३ महत्वपूर्ण ३ अंक जोड्दै १३ औं स्थानमा उक्लिएको छ ।
यसअघि पुलिस लिग तालिकाको पुच्छारमा थियो । पराजित आर्मीको भने ४ खेलमा ५ अंक छ । आर्मी तालिकाको सातौं स्थानमा झरेको छ ।
लेखक
