एजेन्सी । एट्लेटिको डि मड्रिडलाई पराजित गर्दै बुरुसिया डर्टमण्ड युरोपेली क्लब फुटबलको शीर्ष प्रतियोगिता युईएफए च्याम्पियन्स लिगको सेमिफाइनलमा प्रवेश गरेको छ ।
मंगलवार राति भएको क्वाटरफाइनलअन्तर्गत दोस्रो लेग खेलमा स्पेनिस क्लब एट्लेटिको डि मड्रिडमाथि ४–२ समग्रमा ५–४ को जित रच्दै जर्मन क्लब बुरुसिया डर्टमण्ड च्याम्पियन्स लिगको सेमिफाइनलमा प्रवेश गरेको हो ।
क्वाटरफाइनलअन्तर्गत पहिलो लेगमा २–१ को हार बेहोरेको डर्टमण्डले दोस्रो लेगमा भने पुनरागमन गर्दै ४–२ समग्रमा ५–४ को जित हासिल गर्न सफल भयो ।
योसंगै स्पेनिस क्लब भने प्रतियोगिताबाट बाहिरिएको छ ।
डर्टमण्डको घरेलु मैदान सिग्नल इन्दु पार्क रंगशालामा भएको खेलमा घरेलु टोलीलाई जित दिलाउन जुलियान ब्रान्डट, इयान माट्सेन, निकलास फुलक्रुग र मार्केल सबिस्टारले गोल गरे ।
पराजित एट्लेटिकोका लागि भने एन्जेल कोरियाले एक गोल फर्काउँदा अर्को एक गोल डर्टमण्डका म्याट्स हुम्मेल्सको आत्मघाती गोलमार्फत् प्राप्त गर्यो ।
पहिलो हाफको ३४ औं मिनेटमा म्याट हुम्मेल्सको पासमा ब्रान्डटले गोल गर्दा घरेलु टोली १–० समग्रमा २–२ को बराबरीमा आयो ।
त्यस्तै, ३९ औं मिनेटमा सबिस्टारको पासमा माट्सेनले गोल गर्दा डर्टमण्ड २–० समग्रमा ३–२ ले अघि बढ्यो ।
तर, दोस्रो हाफको ४९ औं मिनेटमा हुम्मेल्सले आत्मघाती गोल गर्न पुग्दा खेल २–१ समग्रमा ३–३ को बराबरीमा आयो ।
त्यसपछि ६४ औं मिनेट भ्रमणकारी टोलीका लागि कोरियाले गोल गर्दा खेल २–२ समग्रमा ३–४ को अवस्थामा आयो ।
तर, ७१ औं मिनेटमा सबिस्टारको पासमा फुलक्रुगले डर्टमण्डका लागि गोल गर्दा खेल ३–२ समग्रमा ४–४ को बराबरीमा आयो ।
त्यसको तीन मिनेटपछि नै फुलक्रुगको पासमा सबिस्टारले गोल थप्दा डर्टमण्ड ४–२ समग्रमा ५–४ ले विजयी भयो ।
अब सेमिफाइनलमा डर्टमण्डले फ्रान्सेली महारथी पेरिस सेन्ट जर्मनसंग खेल्नुपर्ने भएको छ ।
लेखक
