एजेन्सी । विश्व क्रिकेटको एकदिवसिय ढाँचाको विश्वकप क्रिकेट आउन अब एक साता भन्दा कमको समय बाँकी छ ।
१३ औं संस्करणको आईसीसी विश्वकप २०२३ को आयोजना छिमेकी राष्ट्र भारतले गर्दैछ ।
प्रतियोगिता अक्टुबर ५ देखि नभेम्बर १९ तारिखसम्म अर्थात् असोज १८ गतेदेखि कार्तिक २ गतेसम्म आयोजना हुँदैछ ।
भारतले पहिलोपल्ट एकल रुपमा एकदिवसिय विश्वकप आयोजना गर्न लागेको हो ।
त्यसअघि सन् १९८७, १९९६ र २०११ मा भारतले अन्य राष्ट्रहरुसंग मिलेर सह–आयोजकको हैसियतमा प्रतियोगिता आयोजना गरेको थियो ।
यस संस्करणका प्रतियोगिताका खेलहरु भारतका १० सहरमा आयोजना हुँदैछन् ।
प्रतियोगिताको सेमिफाइनलका खेलहरु मुम्बइस्थित वानखडे रंगशाला र कोलकतास्थित इडेन गार्डेन रंगशालामा हुने तय भएको छ भने फाइनल खेल अहम्दावादस्थित नरेन्द्र मोदी अन्तराष्ट्रिय क्रिकेट रंगशालामा हुनेछ ।
प्रतियोगिताको उद्घाटन समारोह भने अक्टुबर ४ तारिख अर्थात् असोज १७ गते हुँदैछ । यो भनेको प्रतियोगिताको उद्घाटन खेलको एकदिन अगाडी हो ।
कुल ४८ खेल हुने प्रतियोगिता अन्तराष्ट्रिय क्रिकेट परिषद् (आईसीसी) को नेतृत्वमा हुनेछ ।
प्रत्येक ४ वर्षको अन्तरालमा हुने प्रतियोगितामा १० राष्ट्रको सहभागिता रहनेछ ।
यसं संस्करणमा घरेलु टोली भारतसहित इंग्ल्याण्ड, न्युजिल्याण्ड, अष्ट्रेलिया, दक्षिण अफ्रिका, पाकिस्तान, बंगलादेश, अफगानिस्तान, श्रीलंका र नेडरल्याण्ड्स सहभागी हुँदैछन् ।
भारत, इंग्ल्याण्ड, न्युजिल्याण्ड, अष्ट्रेलिया, दक्षिण अफ्रिका, पाकिस्तान, बंगलादेश र अफगानिस्तान आईसीसी सुपर लिगबाट विश्वकपमा छनोट भएका राष्ट्रहरु हुन् भने श्रीलंका र नेडरल्याण्ड्स भने आईसीसी विश्वकप ग्लोबल क्वालिफायरबाट छानिएर विश्व कपमा आएका हुन् ।
यता, १२ औं संस्करणसम्म लगातार विश्वकप खेल्दै आएको वेस्ट इन्डिज भने यसपल्ट छनोट हुन सकेन ।
प्रतियोगिताको उद्घाटन खेल साविक विजेता इंग्ल्याण्ड र साविक उपविजेता न्युजिल्याण्डबीच अक्टुबर ५ तारिखमा हुनेछ । सो खेल अहम्दावादस्थित नरेन्द्र मोदी अन्तराष्ट्रिय क्रिकेट रंगशालामा हुनेछ ।
पछिल्लोपल्ट सन् २०१९ मा इंग्ल्याण्डमा भएको विश्वकप घरेलु टोली इंग्ल्याण्डले फाइनलमा न्युजिल्याण्डलाई हराएर जितेको थियो ।
राउण्ड एण्ड रोविन र नकआउट प्रणालीमा हुने प्रतियोगितामा समूह चरणमा प्रत्येक राष्ट्रले प्रत्येकसंग प्रतिस्पर्धा गर्नेछ ।
समूह तालिकाको शीर्ष ४ मा रहन सफल हुने राष्ट्रहरु सेमिफाइनलमा प्रवेश गर्नेछन् भने बाँकी ६ राष्ट्र प्रतियोगिताबाट बाहिरिनेछ ।
समूह तालिकामा शीर्ष स्थानमा रहने राष्ट्र र चौथौं स्थानमा रहने राष्ट्रबीच पहिलो सेमिफाइनलमा प्रतिस्पर्धा हुनेछ भने समूह तालिकाको दोस्रो र तेस्रो स्थानमा रहने दुई राष्ट्रबीच दोस्रो सेमिफाइनलमा प्रतिस्पर्धा हुनेछ ।
सेमिफाइनलका विजेता राष्ट्रहरुबीच फाइनलमा उपाधिका लागि प्रतिस्पर्धा हुनेछ ।
विश्वकप विजेता राष्ट्रले विश्वकप ट्रफीसंगै ४ मिलियन डलर पुरस्कार राशी जित्नेछ भने उपविजेता हुने राष्ट्रले २ मिलियन डलर पुरस्कार राशी जित्नेछ ।
त्यस्तै, सेमिफाइनलमा पराजित हुने दुई राष्ट्रले भने ८–८ लाख डलर पाउनेछ ।
लेखक
