एजेन्सी । उरुग्वेले कोपा अमेरिकामा बोलिभियामाथि फराकिलो जित निकालेको छ ।
शुक्रवार विहान भएको खेलमा उरुग्वेले तुलनात्मक रुपमा कमजोर प्रतिद्वन्दी बोलिभियामाथि ५–० को फराकिलो जित निकालेको हो ।
संयुक्त राज्य अमेरिकाको न्यु जर्सीस्थित मेटलाइफ स्टेडियममा भएको खेलमा उरुग्वेलाई जिताउन फाकुन्डो पिल्लिस्ट्री, डार्विन नुनेज, म्याक्सिमिलिनाओ अरौजो, फेडेरिको भालभाल्ड्रे र रोड्रिगो बेन्टानकुरले गोल गरे ।
खेल सुरु भएको ८ औं मिनेटमा रोनाल्ड अरांजोको पासमा पिल्लिस्ट्रीले गोल गर्दै उरुग्वेलाई सुरुवाती अग्रता दिलायो ।
त्यसपछि २१ औं मिनेटमा म्याक्सिमिलिनाओ अरौजोको पासमा नुनेजले गोल थप्दै उरुग्वेलाई २–० ले अघि बढाए ।
यता, दोस्रो हाफको ७७ औं मिनेटमा निकोलास दि ला क्रुजको असिस्टमा म्याक्सिमिलिनाओ अरौजोले गोल गर्दा उरुग्वे ३–० को सहज अग्रतासहित अघि बढ्यो ।
त्यसको चार मिनेटपछि नै ८१ औं मिनेटमा पिल्लिस्ट्रीको पासमा भालभाड्रेले गोल थप्दा उरुग्वे ४–० को फराकिलो अग्रतातर्फ अघि बढ्यो ।
खेलको अन्त्यतिर ८९ औं मिनेटमा जियोर्जियान दि अरास्केटाको असिस्टमा बेन्टानकुरले गोल थप्दा उरुग्वे ५–० ले विजयी भयो ।
एकपक्षिय फराकिलो जितसंगै उरुग्वेले समूह ‘सी’ मा २ खेलबाट ६ अंक जोड्दै तालिकाको शीर्ष स्थानमा कायम रहेको छ ।
योसंगै उरुग्वेले समूह चरणमा एक खेल खेल्न बाँकी रहँदै अघिल्लो चरणको स्थान सुरक्षित गरेको छ ।
पराजि बोलिभियाले भने समान २ खेल खेलिसक्दा अंकको खाता खोल्न सकेको छैन ।
बोलिभिया भने समूह चरणको एक खेल अगावै प्रतियोगिताबाट बाहिरिएको छ ।
त्यसअघि आजै विहान भएको पहिलो खेलमा पानामाले आयोजक राष्ट्र संयुक्त राज्य अमेरिकालाई २–१ ले हरायो ।
जर्जियाको एन्टालान्टास्थित मर्सिडिज बेन्ज स्टेडियममा भएको खेलमा पानामाले एक गोलले पछि परेको अवस्थालाई पुनरागमन गर्दै २–१ को जित निकालेको हो ।
खेलको १८ औं मिनेटमा टिम वेहले रातो कार्ड पाउँदा अमेरिका १० खेलाडीमा समेतियो ।
तर पनि २२ औं मिनेटमा एन्टोनी रोबिन्सनको पासमा फोलारिन बलोगनले गोल गर्दै घरेलु टोलीलाई सुरुवाती अग्रता दिलायो ।
यता, २६ औं मिनेटमा केसार ब्लाकम्यानले पानामाका लागि गोल फर्काउँदा खेल १–१ को बराबरीमा आयो ।
त्यसपछि दोस्रो हाफको ८३ औं मिनेटमा अबदिल एयार्जाको पासमा जोसे फजार्डोले गोल गर्दै पानामालाई २–१ ले जिताए ।
पुनरागमन जितसंगै समूह ‘सी’ मा रहेको पानामाको २ खेलबाट ३ अंक भएको छ ।
पानामा तालिकाको तेस्रो स्थानमा रहेको छ ।
पराजित अमेरिकाको पनि समान २ खेलबाट ३ नै अंक रहेको छ ।
तर, गोलअन्तरका आधारमा अमेरिका तालिकाको दोस्रो स्थानमा रहेको छ ।
लेखक
