एजेन्सी । इंग्लिस घरेलु फुटबलको नकआउट प्रतियोगिता इएफएल कपको तेस्रो चरणअन्तर्गत खेलमा म्यानचेस्टर युनाइटेडले एकपक्षिय फराकिलो जित रचेको छ ।
मंगलवार राति भएको खेलमा प्रिमियर लिग क्लब म्यानचेस्टर युनाइटेडले लिग वान क्लब बर्नस्लेमाथि ७–० को एकपक्षिय फराकिलो जित रचेको हो ।
युनाइटेडको घरेलु मैदान ओल्डट्राफेड रंगशालामा भएको खेलमा घरेलु टोलीलाई लिग कप इतिहासमै फराकिलो अन्तरको जित दिलाउन मार्कुस रासफोर्ड, आलेहान्ड्रो ग्रानाचो र क्रिस्टियन इरेक्सनले समान दुई–दुई गोल गर्दा एन्टोनी सान्तोषले एक गोल गरे ।
खेल सुरु भएको १६ औं मिनेटमा ग्रानाचोको पासमा रासफोर्डले गोल गर्दै घरेलु टोलीलाई सुरुवाती अग्रता दिलाए ।
त्यसपछि ३५ औं मिनेटमा प्राप्त पेनाल्टीमा एन्टोनीले गोल गर्दै युनाइटेडलाई २–० ले अघि बढायो ।
यता, पहिलो हाफाको इन्जुरी समयको दोस्रो मिनेटमा रासफोर्डको पासमा ग्रानाचोले गोल गर्दा युनाइटेड पहिलो हाफसम्म ३–० ले अघि बढ्यो ।
दोस्रो हाफको ४९ औं मिनेटमा इरेक्सनको पासमा ग्रनाचोले गोल थप्दा रेड डेभिल्सका रुपमा समेत चिनिने युनाइटेड ४–० ले अघि बढ्यो ।
त्यस्तै, ५८ औं मिनेटमा ग्रानाचोकै पासमा रासफोर्डले गोल थप्दा युनाइटेड ५–० ले अघि बढ्यो ।
यता, ८१ औं मिनेटमा परिवर्तित खेलाडीका रुपमा मैदान छिरेका ब्रुनो फर्नान्डेजको पासमा इरेक्सनले गोल गर्दा प्रिमियर लिग क्लब ६–० ले अघि बढ्यो ।
खेलको अन्त्यतिर ८५ औं मिनेटमा फर्नान्डेजकै असिस्टमा इरेक्सनले गोल थप्दा युनाइटेड ७–० ले विजयी भयो ।
एकपक्षिय फराकिलो जितसंगै युनाइटेड काराबाओ कपका रुपमा समेत चिनिने इएफएल कपको चौथौं चरणमा प्रवेश गरेको छ ।
लेखक
