एजेन्सी । बलियो इंग्ल्याण्डलाई पराजित गर्दै वेस्ट इन्डिज आईसीसी महिला टि–२० विश्वकपको सेमिफाइनलमा प्रवेश गरेको छ ।
मंगलवार भएको समूह चरणको अन्तिम खेलमा इंग्ल्याण्डलाई ६ विकेटले पराजित गर्दै वेस्ट इन्डिज सेमिफाइनलमा प्रवेश गरेको हो ।
जितसंगै वेस्ट इन्डिज ४ खेलबाट ३ मा जित र १ मा हारको नतिजासहित ६ अंक जोडेरसमूह ‘बी’ को विजेता बनेको छ ।
पराजित इंग्ल्याण्डको भने समान ४ खेलमा समान ६ नै अंक रहेतापनि नेट रननेटका आधारमा तेस्रोमा रहँदै प्रतियोगिताबाट बाहिरिएको छ ।
६ नै अंक रहेको दक्षिण अफ्रिकाले भने नेट रननेटका आधारमा दोस्रोमा रहँदै समूह उपविजेता बन्दै सेमिफाइनलमा स्थान सुरक्षित गर्यो ।
युएईको दुबईस्थित दुबई अन्तर्राष्ट्रिय क्रिकेट रंगशालामा भएको खेलमा १४२ रनको विजयी लक्ष्यका साथ जवाफी ब्याटिङमा उत्रिएको वेस्ट इन्डिजले १८ ओभर खेल्नेक्रममा ४ विकेट गुमाएर १४४ रन जोड्यो ।
वेस्ट इन्डिजको जितमा ओपनर ब्याटर क्वेना जोसेफले ३८ बलमा ६ चौका र २ छक्का प्रहार गर्दै ५२ रनको अर्धशतकिय पारी खेल्दा अर्का ओपनर तथा कप्तान हेले म्याथ्युजले ३८ बल खेल्नेक्रममा ७ चौका र १ छक्का प्रहार गर्दै ५० रनको अर्धशतक बनाइन् ।
त्यस्तै, डियान्द्रा डोटिनले १९ बलमा समान २ चौका र २ छक्का प्रहार गर्दै २७ रन जोडेर आउट हुँदा शेमेनी क्याम्पवेल ५ रनमा रनआउट भइन् ।
यता, आलिया आलेन ८ रनमा अविजित रहिन् ।
वेस्ट इन्डिजले अतिरिक्त रुपमा २ रन जोड्यो ।
इंग्ल्याण्डका लागि नाट सिभेर ब्रन्ट, सोफी इसेल्टन र साराह ग्लिनले समान १–१ विकेट लिइन् ।
त्यसअघि टस हारेर पहिला ब्याटिङमा उत्रिएको इंग्ल्याण्डले निर्धारित २० ओभरको खेलमा ७ विकेट गुमाएर १४१ रन जोड्यो ।
इंग्ल्याण्डका लागि नाट सिभेर ब्रन्टले ५० बलमा ५ चौका प्रहार गर्दै ५७ रनको अर्धशतकिय पारी खेल्दा कप्तान हिथर नाइटले १३ बल खेल्नेक्रममा ३ चौका प्रहार गर्दै २१ रन जोडेर पेविलियन फर्किन् ।
त्यस्तै, ओपनर ब्याटर ड्यानी वाट होड्गेले १२ बलमा १ चौका प्रहार गर्दै १६ रन जोडेर आउट हुँदा अर्का ओपनर मिया बाउचेरले १९ बल खेल्नेक्रममा १ चौका प्रहार गर्दै १४ रन जोडेर पेविलियन फर्किन् ।
यता, विकेटकिपर एमी जोन्स, ड्यानीले जिब्सन र सोफी इसेल्टनले समान ७–७ रन जोडेर आउट हुँदा चार्ली डिन ५ तथा एलिसे कास्पे १ रनमा पेविलियन फर्किन् ।
साराह ग्लिन भने १ रनमा अविजित रहिन् ।
इंग्ल्याण्डले अतिरिक्त रुपमा ५ रन जोड्यो ।
वेस्ट इन्डिजका लागि अफे फ्लिचेरले ३ विकेट लिँदा हेले म्याथ्युजले २ तथा डियान्द्रा डोटिनले १ विकेट लिइन् ।
लेखक
