एजेन्सी । इंग्लिस प्रिमियर लिगमा सनिवार राति ८ खेल भए । जसमध्ये बलिया क्लबहरुमा आर्सनलले एस्टनभिल्लामाथि जित हात पार्दा म्यानचेस्टर सिटी नटिङघम फोरेस्टसंग बराबरीमा रोकिएको छ ।
त्यस्तै, लिभरपूलले न्युक्यासल युनाइटेडमाथि जित निकाल्दा चेल्सी भने साउथह्याम्टनसंग पराजित भयो ।
एस्टनभिल्लाविरुद्व आर्सनल (२–४)
एस्टनभिल्लाको घरेलु मैदान भिल्ला पार्कमा आर्सनलले पुनरागमन जित निकाल्दै प्रिमियर लिगको शीर्ष स्थानमा उक्लिएको छ । २ पटक पछि परेको अवस्था उल्ट्याउँदै आर्सनलले खेल ४–२ ले जितेको हो ।
खेलको ५ औं मिनेटमा ओले वाटकिटनको गोलमार्फत घरेलु टोलीले खेलमा सुरुवाती अग्रता लिएको थियो । तर, १६ औं मिनेटमा बुकायो साकाको गोलमार्फत आर्सनलले खेलमा बराबरी गर्यो ।
त्यसपछि पुनः ३१ औं मिनेटमा फिलिप कोन्टिन्होले गोल गर्दै एस्टनभिल्लालाई खेलमा २–१ ले अघि बढाए ।
दोस्रो हाफको ६१ औं मिनेटमा ओलेक्जान्डर जिन्चेन्कोले गोल गर्दै आर्सनललाई खेलमा २–२ को बराबरीमा ल्याएका थिए ।
बराबरी उन्मुख खेलको अन्त्यतिर ९३ र ९८ औ मिनेटमा लगातार २ गोल थप्दै आर्सनलले खेल ४–२ ले जित्यो ।
जितसंगै आर्सनलले २३ खेलमा ५४ अंक जोडेको छ । आर्सनल तालिकाको शीर्ष स्थानमा उक्लिएको छ । यता, पराजित एस्टनभिल्ला समान खेलमा २८ अंकका साथ ११ औं स्थानमा छ ।
नटिङघम फोरेस्टविरुद्व म्यानचेस्टर सिटी (१–१)
साविक विजेता म्यानचेस्टर सिटी नटिङघम फोरेस्टसंग बराबरीमा रोकिएसंगै प्रिमियर लिगमा शीर्ष स्थानमा उक्लिने मौका गुमाएको छ ।
साविक विजेता समेत रहेको म्यानचेस्टर सिटी नटिङघम फोरेस्टसंग १–१ को बराबरीमा रोकिएको हो ।
द सिटी ग्राउन्डमा भएको खेलमा बर्नार्डो सिल्भाले खेलको ४१ औं मिनेटमा गोल गर्दै भ्रमणकारी टोलीलाई अग्रता दिलाएका थिए । तर, ८४ औं मिनेटमा घरेलु टोली खेलमा फर्कियो ।
क्रिस्टोफर उडले गोल गर्दै खेललाई १–१ को बराबरीमा ल्याएका थिए ।
सिटीको २४ खेलमा ५२ अंक छ । सिटी एक खेल कम खेलेको आर्सनलको भन्दा २ अंकले पछि रहँदै तालिकाको दोस्रो स्थानमा रह्यो ।
यता, सिटीलाई बराबरीमा रोकेको घरेलु टोलीको २३ खेलमा २५ अंक छ । फोरेस्ट तालिकाको १३ औं स्थानमा उक्लिएको छ ।
चेल्सीविरुद्व साउथह्याम्टन (०–१)
जारी सिजन लागातार खराब प्रदर्शन गरिरहेको चेल्सी पुच्छारमा रहेको साउटह्याम्टनसंग १–० ले स्तब्ध भएको छ ।
चेल्सी घरेलु मैदान स्टामफोर्ड ब्रिजमै पराजित भएको हो ।
जनवरी ट्रान्सफर बजारमा अत्यधिक खर्च गरेतापनि चेल्सी खराब लयबाट मुक्त हुन सकेको छैन ।
चेल्सीलाई हराउन जेम्स वार्ड प्रोउसले खेलको ४६ औं मिनेटमा एकमात्र निर्णायक गोल गरे ।
हारसंगै चेल्सी २३ खेलमा ३१ अंकका साथ लिग तालिकाको १० औं स्थानमा छ । साउटह्याम्टनको २३ खेलमा १८ अंक भएको छ ।
न्युक्यासल युनाइटेडविरुद्व लिभरपूल (२–०)
डार्विन नुनेज र कोडी गाक्पोको गोलमा लिभरपूलले न्युक्यासल युनाइटेडलाई पराजित गरेको छ । न्युक्यासललाई उसैको मैदानमा लिभरपूलले २–० ले पराजित गरेको हो ।
जारी लिगमा लयमा रहेको न्युक्यासललाई पराजित गर्न खेलको १० औं मिनेटमा नुनेज र १७ औं मिनेटमा गाक्पोले गोल गरेका थिए ।
२२ औं मिनेटमा घरेलु टोलीका गोलकिपर निक पोप रातो कार्ड खाँदै मैदान बाहिरिदा घरेलु टोली १० खेलाडीमा समेतिएको थियो ।
लिभरपूलको २२ खेलमा ३५ अंक बटुलेको छ । लिभरपूल तालिकाको ८ औं स्थानमा उक्लिएको छ । पराजित न्युक्यासलको २३ खेलमा ४१ अंक छ । न्युक्यासल चौथौं स्थानमा छ ।
सनिवार नै भएको अन्य प्रिमियर लिग खेलमा बर्नमाउथले उल्भ्सलाई १–० ले पराजित गर्दा बन्टफोर्ड र क्रिस्टल प्यालेसले १–१ को बराबरी खेलेको छ । ब्राइटन फुलहमसंग १–० ले पराजित हुँदा एभर्टनले लिड्स युनाइटेडलाई १–० ले पराजित गर्यो ।
लेखक
