भक्तपुर । युनाइटेड अरब इमिरेट्स (युएई) मा जारी आईसीसी क्रिकेट विश्वकप लिग २ अन्तर्गत त्रिकोणात्मक सिरिजको खेलमा क्यानडाले स्कटल्याण्डमाथि सहज जित निकालेको छ ।
विहिवार भएको लिग २ अन्तर्गत खेलमा क्यानडाले स्कटल्याण्डमाथि ५ विकेटको जित निकालेको हो ।
महत्वपूर्ण जितसंगै क्यानडाले ४ खेलमा शतप्रतिशत जित हासिल गर्दै अंक तालिकामा ८ अंक जोड्दै शीर्ष स्थानमा रहेको छ ।
पराजित स्कटल्याण्डको भने ३ खेलमा १ मा जित र २ मा हारको नतिजासहित तालिकाको चौथौं स्थानमा रहेको छ ।
दुबईको दुबई अन्तर्राष्ट्रिय रंगशालामा भएको खेलमा १९८ रनको मध्यम विजयी लक्ष्यका साथ जवाफी ब्याटिङमा उत्रिएको क्यानडाले ४५.४ ओभरमा ५ विकेट गुमाउँदै २०० रन जोड्यो ।
क्यानडाको जितमा हर्ष थाकेरले १५१ बलमा ८ चौका र १ छक्का प्रहार गर्दै सर्वाधिक १०५ रनको शतकिय पारी खेल्दै अविजित रहँदा निकोलास क्रिटनले ६४ बल खेल्नेक्रममा ३ चौका प्रहार गर्दै ४४ रन जोडेर पेविलियन फर्किए ।
त्यस्तै, श्रेयास मोभ्भाले २९ बलमा २ चौका प्रहार गर्दै २० रन जोडेर अविजित रहँदा आरोन जोनसनले ११ बलमा २ छक्का प्रहार गर्दै १५ रन जोडेर पेविलियन फर्किए ।
यता, परगत सिंहले ८, विकेटकिपर श्रीमान्थ विजयरत्ने २ र नभनित धलिवाल १ रनमा पेविलियन फर्किए ।
क्यानडाले अतिरिक्त रुपमा ५ रन जोड्यो ।
स्क्टल्याण्डका लागि ब्राड ह्विलले २ विकेट लिँदा ब्राड्ले कुरेइ र सफयान शरिफले समान १–१ विकेट लिए ।
त्यसअघि टस हारेर पहिला ब्याटिङमा उत्रिएको स्कटल्याण्डले ४७.३ ओभरमा अलआउट हुँदै १९७ रन जोड्यो ।
स्कटल्याण्डका लागि ओपनर ब्याट्सम्यान जर्ज मुन्सेले ४७ बलमा ६ चौका प्रहार गर्दै ३६ रन जोडेर पेविलियन फर्किदा ब्राडन म्यानमुलेनले २९ बल खेल्दै २ चौका र १ छक्का प्रहार गर्दै ३३ रन जोडेर आउट भए ।
त्यस्तै, कप्तान रिची बेरिङटनले ४६ बलमा ३ चौका प्रहार गर्दै ३० रन जोडेर आउट हुँदा ब्राड ह्विलले ३७ बल खेल्नेक्रममा २ चौका प्रहार गर्दै २४ रन जोडेर पेविलियन फर्किए ।
यता, अर्का ओपनर चार्लिस टेरले ३६ बलमा १ चौका मद्दतमा १८ रन जोडेर आउट हुँदा विकेटकिपर म्याथ्यु क्रसले ३१ बलको सामाना गर्दा १ चौका प्रहार गर्दै १७ रन जोडेर पेविलियन फर्किए ।
ब्राड्ले कुरी ८ रनमा अविजित रहँदा मार्क वाट ९, स्कट कुरी ५, माइकल लिइक्स २ र सफयान शरिफ शुन्य रनमा पेविलियन फर्किए ।
स्कटल्याण्डले अतिरिक्त रुपमा १५ रन जोड्यो ।
स्कटल्याण्डलाई अलआउट गर्न क्यानडाका लागि हर्ष थाकेरले ३ विकेट लिँदा कप्तान साद बिन जफर र अमर खालिदले समान २–२ विकेट लिए ।
त्यस्तै, कलिम साना, डिलन हेलिगर र निकोलास क्रिटनले समान १–१ विकेट लिए ।
लेखक
