एजेन्सी । इन्डियन प्रिमियर लिग (आईपिएल) अन्तर्गत खेलमा राजस्थान रोयल्सले मुम्बई इन्डियन्समाथि सहज जित निकालेको छ ।
सोमवार राति भएको आईपिएल खेलमा राजस्थान रोयल्सले मुम्बई इन्डियन्समाथि ६ विकेटको सहज जित निकालेको हो ।
योसंगै जारी आईपिएलमा राजस्थान ३ खेलमा शतप्रतिशत जितका साथ ६ अंक जोड्दै लिग तालिकाको शीर्ष स्थानमा उक्लिएको छ ।
यता, पाँच पटकका पुर्व विजेता मुम्बईले भने ३ खेल खेलिसक्दा सबैमा पराजय बेहोर्दै शुन्य अंकका साथ तालिकाको पुच्छारमा रहेको छ ।
मुम्बईको घरेलु मैदान वानखडे स्टेडियममा भएको खेलमा १२६ रनको सामान्य विजयी लक्ष्य पछ्याएको भ्रमणकारी टोली राजस्थानले १५.३ ओभरमा ४ विकेट गुमाउँदै १२७ रन जोड्यो ।
राजस्थानको जितमा रियान परागले ३९ बलमा ५ चौका र ३ छक्का प्रहार गर्दै ५४ रनको अर्धशतकिय पारी खेल्दै अविजित रहँदा रविचन्द्रन आश्विनले १६ बल खेल्नेक्रममा १ चौका प्रहार गर्दै १६ रन जोडेर पेविलियन फर्किए ।
त्यस्तै, ओपनर ब्याट्सम्यान जोस बटलरले १६ बलमा २ चौका प्रहार गर्दै १३ रन बनाएर आउट हुँदा कप्तान तथा विकेटकिपर सन्जु सामसनले १० बल खेल्नेक्रममा ३ चौका प्रहार गर्दै १२ रन जोड्दै पेविलियन फर्किए ।
यता, अर्का ओपनर यशस्वी जैसवालले ६ बलमा २ चौका प्रहार गर्दै १० रन जोडेर आउट हुँदा इम्प्याक्ट प्लेयरका रुपमा मैदान छिरेका शुभम् दुबेले ६ बलमा १ चौका प्रहार गर्दै ८ रन जोडेर अविजित रहे ।
राजस्थानले अतिरिक्त रुपमा १४ रन जोड्यो ।
मुम्बईका लागि आकाश मधवालले ४ ओभर बलिङ गर्दै २० रन दिएर ३ विकेट लिँदा क्वेना माफाकाले २ ओभरमा २३ रन खर्चिएर १ विकेट लिए ।
त्यसअघि टस हारेर पहिला ब्याटिङमा उत्रिएको मुम्बईले निर्धारित २० ओभरको खेलमा ९ विकेट गुमाउँदै १२५ रन जोड्यो ।
मुम्बईका लागि कप्तान हार्दिक पाण्डेयाले २१ बलमा ६ चौका प्रहार गर्दै ३४ रन जोड्दा तिलक बर्माले २९ बल खेल्नेक्रममा २ छक्का प्रहार गर्दै ३२ रन जोडेर पेविलियन फर्किए ।
त्यस्तै, ओपनर ब्याट्सम्यान तथा विकेटकिपर इशान किसनले १४ बलमा २ चौका र १ छक्का प्रहार गर्दै १६ रन जोडेर आउट हुँदा टिम डेभिडले २४ बलको सामाना गर्दा १ चौका मद्दतमा १७ रन जोडेर पेविलियन फर्किए ।
यता, जसप्रिति बुमराह ८ र आकाश मधवाल ४ रनमा अविजित रहँदा गेराल्र्ड कोएट्जे ४ र पियुष चावला ३ रनमा पेविलियन फर्किए ।
मुम्बईका ३ ब्याट्सम्यान अंकको खाता नै नखोलि पेविलियन फर्किए ।
मुम्बईले अतिरिक्त रुपमा ७ रन जोड्यो ।
मुम्बईलाई सस्तैमा समेत्न राजस्थानका लागि ट्रेन्ट बोल्टले ४ ओभर बलिङ गर्नेक्रममा २२ रन दिएर ३ विकेट लिँदा युजभेन्द्र चाहालले पनि ४ ओभर बलिङ गर्दै मात्र ११ रन दिएर ३ विकेट लिए ।
त्यस्तै, नान्द्रे बर्गरले ४ ओभर बलिङ गर्दै ३२ रन खर्चिएर २ विकेट लिँदा आभेश खानले ४ ओभरमा ३० रन दिएर १ विकेट लिए ।
लेखक
