एजेन्सी । भारतमा जारी इन्डियन प्रिमियर लिग (आईपिएल) अन्तर्गत खेलमा गुजरात टाइटन्समाथि दिल्ली क्यापिटल्सले रोमाञ्चक जित हासिल गरेको छ ।
बुधवार राति भएको आईपिएल खेलमा गुजरात टाइटन्समाथि दिल्ली क्यापिटल्सले ४ रनको रोमाञ्चक जित हासिल गरेको हो ।
महत्वपूर्ण जितसंगै दिल्लीले ९ खेलमा ८ अंक जोड्दै लिग तालिकाको छैटौं स्थानमा उक्लिएको छ ।
पराजित गुजरातको समान ९ खेलमा ८ अंकसहित तालिकाको सातौं स्थानमा रहेको छ ।
दिल्लीको घरेलु मैदान अरुण जेट्ली रंगशालामा भएको खेलमा २२५ रनको विजयी लक्ष्यसहित जवाफी ब्याटिङम उत्रिएको गुजरातले निर्धारित २० ओभरको खेलमा ८ विकेट गुमाउँदै २२० रन मात्र जोड्न सक्यो ।
गुजरातका लागि इम्प्याक्ट प्लेयरका रुपमा मैदान आएका साइ सुदर्शनले ३९ बलमा ७ चौका र २ छक्का प्रहार गर्दै ६५ रनको अर्धशतकिय पारी खेल्दा डेभिड मिलरले २३ बल खेल्दै ६ चौका र ३ छक्का प्रहार गर्दै ५५ रनको अर्धशतकिय पारी खेल्दै पेविलियन फर्किए ।
त्यस्तै, ओपनर ब्याट्सम्यान तथा विकेटकिपर व्द्दिमन साहाले २५ बलमा ५ चौका र १ छक्का प्रहार गर्दै ३९ रन जोडेर आउट हुँदा राशिद खानले ११ बल खेल्नेक्रममा ३ चौका र १ छक्का प्रहार गर्दै २१ रन जोडेर अविजित रहे ।
यता, रविश्रीनिवासन साइ किशोरले ६ बलम २ छक्का प्रहार गर्दै १३ रन जोडेर आउट हुँदा शाहरुख खान ८, कप्तान सुभमन गिल ६, राहुल तेवातिया ४ र अज्मतुल्लाह ओमारजायी १ रनमा पेविलियन फर्किए ।
उता, मोहित शर्मा भने शुन्य रनमा अविजित रहे ।
गुजरातले अतिरिक्त रुपमा ८ रन जोड्यो ।
दिल्लीको जितमा रासिख सलामले ३ विकेट लिँदा कुलदिप यादवले २ विकेट लिए ।
त्यस्तै, अक्षर पटेल, मुकेश कुमार र एनरिच नोर्ट्जेले समान एक–एक विकेट लिए ।
त्यसअघि टस हारेर पहिला ब्याटिङमा उत्रिएको दिल्लीले निर्धारित २० ओभरको खेलमा ४ विकेट गुमाउँदै २२४ रन जोड्यो ।
दिल्लीका लागि कप्तान तथा विकेटकिपर रिशभ पन्तले ४३ बलमा ५ चौका र ८ छक्का प्रहार गर्दै ८८ रनको अर्धशतकिय पारी खेल्दै अविजित रहँदा अक्षर पटेलले ४३ बल खेल्दै ५ चौका र ४ छक्का प्रहार गर्दै ६६ रनको अर्धशतकिय पारी खेल्दै पेविलियन फर्किए ।
त्यस्तै, ट्रिस्टान स्टुब्सले ७ बलमा ३ चौका र २ छक्का प्रहार गर्दै २६ रन जोडेर अविजित रहँदा ओपनर ब्याट्सम्यान ज्याक फ्रासर म्याकगुर्कले १४ बल खेल्दै २ चौका र २ छक्का प्रहार गर्दै २३ रन जोडेर पेविलियन फर्किए ।
यता, अर्का ओपनर पृथ्वी सले ७ बलमा २ चौका प्रहार गर्दै ११ रन जोडेर पेविलियन फर्किदा शाई होपले ५ रन जोडेर आउट भए ।
दिल्लीले अतिरिक्त रुपमा ५ रन जोड्यो ।
गुजरातका लागि सन्दिप वारियरले ३ विकेट लिँदा नुर अहमदले १ विकेट लिए ।
लेखक
