एजेन्सी । भारतमा जारी इन्डियन प्रिमियर लिग (आईपिएल) को हेभिवेट भिडन्तमा मुम्बई इन्डियन्समाथि चेन्नेई सुपर किंग्सले जित निकालेको छ ।
आईतवार राति भएको हेभिवेट आईपिएल खेलमा मुम्बई इन्डियन्समाथि चेन्नेई सुपर किंग्सले २० रनको जित निकालेको हो ।
सर्वाधिक ५–५ पटकका विजेता प्रतिद्वन्दीबीचको रोमाञ्चक भिडन्तमा चेन्नेईले बाजी मार्न सफल भयो ।
जितसंगै साविक विजेता टोलीले ६ खेलबाट ८ अंक जोड्दै लिग तालिकाको तेस्रो स्थानमा उक्लिएको छ ।
पराजित मुम्बईको समान ६ खेलबाट ४ अंकसहित तालिकाको आठौं स्थानमा रहेको छ ।
मुम्बईको घरेलु मैदान वानखडे रंगशालामा भएको खेलमा २०७ रनको विशाल विजयी लक्ष्य पछ्याएको मुम्बईले निर्धारित २० ओभरको खेलमा ६ विकेट गुमाउँदै मात्र १८६ रनमा समेतियो ।
मुम्बईका लागि ओपनर ब्याट्सम्यान तथा पुर्व कप्तान रोहित शर्माले ६३ बलमा ११ चौका र ५ छक्का प्रहार गर्दै सर्वाधिक १०५ रनको शतकिय पारी खेल्दै अविजित रहेतापनि जित भने दिलाउन सकेन ।
त्यस्तै, तिलक बर्माले २० बलमा ५ चौका प्रहार गर्दै ३१ रन जोडेर आउट हुँदा अर्का ओपनर इशान किसनले १५ बल खेल्दै ३ चौका र १ छक्का प्रहार गर्दै २३ रन जोडेर पेविलियन फर्किए ।
टिम डेभिडले ५ बलमा २ छक्का प्रहार गर्दै १३ रन जोडेर आउट हुँदा कप्तान हार्दिक पाण्डेया २, रोमारियो शेफर्ड १ र इम्प्याक्ट प्लेयरका रुपमा मैदान आएका सुर्यकुमार यादव शुन्य रनमा पेविलियन फर्किए ।
मोहम्मद नाबी भने ४ रनमा अविजित रहे ।
मुम्बईले अतिरिक्त रुपमा ७ रन जोड्यो ।
मुम्बईमाथि जित निकाल्न चेन्नेईका लागि माथिशा पाथिराणाले ४ ओभर बलिङ गर्दै २८ रन दिएर सर्वाधिक ४ विकेट लिँदा तुषार देशपाण्डे र मुस्ताफिजुर रहमानले समान १–१ विकेट लिए ।
त्यसअघि टस हारेर पहिला ब्याटिङमा उत्रिएको चेन्नेईले निर्धारित २० ओभरको खेलमा ४ विकेट गुमाउँदै २०६ रन बनायो ।
चेन्नेईका लागि कप्तान रुतुराज गाइकवादले ४० बलमा ५ चौका र ५ छक्का प्रहार गर्दै ६९ रनको अर्धशतकिय पारी खेल्दा शिभम् दुबेले ३८ बलमा १० चौका र २ छक्का प्रहार गर्दै ६६ रनको अर्धशतकिय पारी खेल्दै अविजित रहे ।
त्यस्तै, ओपनर ब्याट्सम्यान रचिन रबिन्द्रले १६ बलमा २ चौका र १ छक्का प्रहार गर्दै २१ रन जोडेर पेविलियन फर्किदा पुर्वकप्तान तथा विकेटकिपर महेन्द्र सिंह धोनीले मात्र ४ बलमा ३ छक्का प्रहार गर्दै २० रन जोडेर अविजित रहे ।
यता, डर्याल मिट्चेलले १४ बलमा १ चौका प्रहार गर्दै १७ रन जोडेर आउट भए ।
चेन्नेईले अतिरिक्त रुपमा ८ रन जोड्यो ।
मुम्बईका लागि हार्दिक पाण्डेयाले ३ ओभर बलिङ गर्दा ४३ रन खर्चिएर २ विकेट लिँदा गेराल्ड कोएट्जे र श्रेयस गोपालले समान १–१ विकेट लिए ।
लेखक
