एजेन्सी । रोयल च्यालेन्जर्स बेङ्गलुरुले १८ औं संस्करणको इन्डियन प्रिमियर लिग (आईपिएल) को उद्घाटन खेलमा कोलकता नाइट राइडर्समाथि जित निकालेको छ ।
सनिवार राति भएको उद्घाटन खेलमा रोयल च्यालेन्जर्स बेङ्गलुरुले साविक विजेता समेत रहेको कोलकता नाइट राइडर्समाथि ७ विकेटको सहज जित निकालेको हो ।
जितसंगै बेङ्गलुरुले समूह ‘ए’ मा महत्वपूर्ण २ अंक जोडेको छ ।
कोलकताको घरेलु मैदान इडेन गार्डन्स रंगशालामा भएको खेलमा १७५ रनको विजयी लक्ष्यका साथ मैदान उत्रिएको बेङ्गलुरुले १६.२ ओभरमा ३ विकेटको क्षतिमा १७७ रन जोड्यो ।
भ्रमणकारी टोलीलाई जिताउन ओपनर ब्याट्सम्यान विराट कोहोलीले ३६ बलमा ४ चौका र ३ छक्का प्रहार गर्दै ५९ रनको अर्धशतकिय पारी खेल्दै अविजित रहँदा अर्का ओपनर फिल साल्टले ३१ बल खेल्नेक्रममा ९ चौका र २ छक्का प्रहार गरेर ५६ रन जोडेर पेविलियन फर्किए ।
त्यस्तै, कप्तान रजत पाटिदारले १६ बलमा ५ चौका र १ छक्का प्रहार गर्दै ३४ रन जोडेर पेविलियन फर्किदा लैम लिभिङस्टोनले ५ बलको सामना गर्दै २ चौका र १ छक्का प्रहार गरेर १५ रन जोडेर अविजित रहे ।
यता, इम्प्याक्ट प्लेयरका रुपमा मैदान छिरेका देवदुत पादिक्कलले भने १० बलमा १ चौका मद्दतमा १० रन जोडेर पेविलियन फर्किए ।
बेङ्गलुरुले अतिरिक्त रुपमा ३ रन जोड्यो ।
कोलकताका लागि सुनिल नारिने, वरुण चक्रवती र इम्प्याक्ट प्लेयर बैभव अरोराले समान १–१ विकेट लिए ।
त्यसअघि टस हारेर पहिला ब्याटिङमा उत्रिएको कोलकताले निर्धारित २० ओभरको खेलमा ८ विकेट गुमाउँदै १७४ रन जोड्यो ।
कोलकताका लागि कप्तान अजिन्के राहनेले ३१ बलमा ६ चौका र ४ छक्का प्रहार गर्दै ५६ रनको अर्धशतकिय पारी खेल्दा ओपोनर ब्याट्सम्यान सुनिल नारिनेले २६ बल खेल्नेक्रममा ५ चौका र ३ छक्का प्रहार गर्दै ४४ रन जोडेर पेविलियन फर्किए ।
त्यस्तै, अंगक्रिश रघुबंशीले २२ बलमा २ चौका र १ छक्का प्रहार गर्दै ३० रन जोडेर आउट हुँदा रिंकु सिंहले १० बल खेल्नेक्रममा १ चौका प्रहार गर्दै १२ रन जोडेर पेविलियन फर्किए ।
यता, रामदिप सिंह ६ र स्पेन्सर जोन्सन १ रनमा अविजित रहँदा भेनकटेस ऐयर ६, हर्षित राना ५, एन्ड्रे रस्सेल ४ तथा विकेटिकिपर क्विन्टन डि कक ४ रनमा पेविलियन फर्किए ।
कोलकताले अतिरिक्त रुपमा ६ रन जोड्यो ।
बेङ्गलुरुका लागि कुर्णाल पाण्डेयाले ३ विकेट लिँदा जोश हाजेलउडदे २ तथा यश डयाल, राशिख सलाम र सुयान्स शर्माले १–१ विकेट लिए ।
लेखक
