एजेन्सी । उपाधि होडमा रहेको अष्ट्रेलिया जारी ९ औं संस्करणको आईसीसी टि–२० विश्वकपको सुपर ८ मा प्रवेश गरेको छ ।
बुधवार विहान भएको खेलमा बलियो अष्ट्रेलियाले एसोसियट राष्ट्र नामिबियामाथि ९ विकेटको सहज जित निकाल्दै सुपर ८ मा प्रवेश गरेको हो ।
समूह ‘बी’ मा रहेको अष्ट्रेलियाले ३ खेल खेलिसक्दा शतप्रतिशत जित हासिल गर्दै ६ अंक जोड्दै तालिकाको शीर्ष स्थानमा रहेको छ ।
पराजित नामिबियाको समान ३ खेलमा २ अंक रहेको छ ।
नामिबिया भने प्रतियोगिताबाट बाहिरिएको छ ।
वेस्ट इन्डिजस्थित सर भिभियान रिर्चार्डस स्टेडियममा भएको खेलमा ७३ रनको सामान्य विजयी लक्ष्यका साथ जवाफी ब्याटिङमा उत्रिएको अष्ट्रेलियाले ५.४ ओभरमा १ विकेट गुमाउँदै ७४ रन जोड्यो ।
अष्ट्रेलियाको जितमा ओपनर ब्याट्सम्यान टिम हेडले १७ बलमा ५ चौका र २ छक्का प्रहार गर्दै ३४ रन जोड्दै अविजित रहँदा अर्का ओपनर डेभिड वार्नरले ८ बल खेल्नेक्रममा ३ चौका र १ छक्का प्रहार गर्दै २० रन जोडेर पेविलियन फर्किए ।
त्यस्तै, कप्तान मिट्चेल मार्शले ९ बलमा ३ चौका र १ छक्का प्रहार गर्दै १८ रन जोड्दै अविजित रहे ।
अष्ट्रेलियाले अतिरिक्त रुपमा २ रन जोड्यो ।
नामिबियाका लागि डेभिड वेइसेले १ विकेट लिए ।
त्यसअघि टस जितेको अष्ट्रेलियाले नामिबियालाई पहिला ब्याटिङमा निम्त्यायो ।
नामिबियाले १७ ओभरमा अलआउट हुँदै ७२ रन जोड्यो ।
नामिबियाका लागि कप्तान गेर्हार्ड इसास्मुसले ४३ बलमा ४ चौका र १ छक्का प्रहार गर्दै ३६ रन जोड्दै आउट पेविलियन फर्किदा ओपनर ब्याट्सम्यान माइकल भान लिगेनले १० बल खेल्दै २ चौका प्रहार गरेर १० रन जोडेर आउट भए ।
नामिबियाका अन्य कुनैपनि ब्याटरले दोहोरो अंकमा रन जोड्न सकेनन् ।
रुवेन ट्रम्पेलम्यान ७, जेजे स्मिथ ३, निको डाभिन २, जान फ्राइलिंक, विकेटकिपर जेन ग्रिन र डेभिड वेइसे समान १–१ रनमा पेविलियन फर्किदा बेर्नार्ड स्कोल्ट्ज र बेन शिकोङ्गो शुन्य रनमा आउट भए ।
ज्याक ब्रुस्सेल २ रनमा अविजित रहे ।
नामिबियाले अतिरिक्त रुपमा ९ रन जोड्यो ।
नामिबियालाई सस्तैमा अलआउट गर्न एडम जाम्पाले सर्वाधिक ४ विकेट लिँदा जोश हाज्लेउड र मार्कुस स्टोइनिसले समान २–२ विकेट हासिल गरे ।
त्यस्तै, प्याट कमिन्स र नाथान इलिसले १–१ विकेट लिए ।
लेखक
