एजेन्सी । भारतमा जारी एफआईएच हक्की विश्वकपअन्तर्गत पहिलो सेमिफाइनल खेलमा अष्ट्रेलियालाई पराजित गर्दै जर्मनी फाइनलमा प्रवेश गरेको छ ।
शुक्रवार भुवनेश्वरस्थित कालिङ्गा रंगशालामा भएको खेलमा जर्मनीले अष्ट्रेलियामाथि ४–३ को जित हात पार्दै विश्वकपको फाइनलमा प्रवेश गरेको हो ।
दोस्रो क्वाटरसम्म २–० ले पछि रहेको जर्मनीले अष्ट्रेलियामाथि रोमाञ्चक पुनरागमन जित हात पारेको हो ।
खेलको ११ औं मिनेटमा हेवार्ड जेरेमीले गोल गर्दै अष्ट्रेलियालाई सुरुवाती अग्रता दिलाएका थिए ।
पहिलो क्वाटर १–० ले अघि रहेको अष्ट्रेलियाले दोस्रो क्वाटरको २६ औं मिनेटमा इफ्रौम्स नाथनको गोलमार्फत खेलमा २–० को अग्रता लियो ।
तेस्रो क्वाटरको ४२ औं मिनेटमा पिल्लेट गोन्जालोले जर्मनीका लागि गोल गर्दै खेल २–१ को स्थितिमा पु¥याए ।
त्यसपछि चौथौं तथा अन्तिम क्वाटर निर्णायक बन्यो । खेलको ५१ औं मिनेटमा गोन्जालोले व्यक्तिगत रुपमा दोस्रो गोल गर्दा खेल २–२ को बराबरीमा ल्याए ।
त्यसपछि पुनः ५७ औं मिनेटमा गोभेर्स ब्लाकले गोल गर्दा अष्ट्रेलिया ३–२ ले अघि बढ्यो ।
यता, लगत्तै ५८ औं मिनेटमा गोन्जालोले ह्याट्रिक हान्दा खेल ३–३ को रोमाञ्चक बराबरीमा पुग्यो ।
खेल सकिन एक मिनेट बाँकी रहँदा ५९ औं मिनेटमा जर्मन खेलाडी वेल्लेन निकलासले गोल गर्दा जर्मनी ४–३ ले जित्यो ।
जितसंगै जर्मनी १३ वर्षपछि विश्वकपको फाइनलमा प्रवेश गरेको हो ।
अब जर्मनीले बेल्जियम र नेडरल्याण्ड्सको विजेतासंग उपाधिका लागि प्रतिस्पर्धा गर्नेछ ।
लेखक
