एजेन्सी । दक्षिण अफ्रिकामा जारी आईसीसी महिला टि–२० विश्वकपमा अष्ट्रेलियाले बंगलादेशमाथि ८ विकेटको जित हात पारेको छ ।
मंगलवार राति भएको खेलमा साविक विजेता समेत रहेको अष्ट्रेलियाले १०८ रनको सामान्य विजयी लक्ष्य पछ्याउने क्रममा १८.२ ओभरमा १११ रन जोड्दै बंगलादेशमाथि ८ विकेटको जित हात पारेको हो ।
सेन्ट जोर्जेज पार्कमा भएको खेलमा बलियो अष्ट्रेलियाका लागि कप्तान मेग लानेङले ४९ बलमा ४ चौका प्रहार गर्दै सर्वाधिक ४८ रन बनाउँदै अविजित रहिन् ।
त्यस्तै, विकेटकिपर समेत रहेकी एलेस्से हिलेले ३६ बल खेल्दै ४ चौका र १ छक्का प्रहार गर्दै ३७ रनको योगदान गरिन् ।
एह्स्ली गार्डनर २० बलमा २ चौका मद्दतमा १९ रनमा नटआउट रहँदा बेथ मोनी २ रनमा पेविलियन फर्किन् । अष्ट्रेलियाले ५ रन अतिरिक्त रुपमा पाएको थियो ।
बंगलादेशका लागि मारुफा अक्टर र शोर्ना अक्टरले १–१ विकेट लिइन् ।
त्यसअघि टस जितेर पहिला ब्याटिङमा उत्रिएको बंगलादेशले २० ओभर ७ विकेट गुमाउँदै १०७ रन बनाएको थियो ।
बंगलादेशका लागि कप्तान निगार सुल्तानाले ५० बलमा ७ चौका र १ छक्का प्रहार गर्दै सर्वाधिक ५७ रनको अर्धशतकिय पारी खेलिन् ।
त्यस्तै, शोर्ना अक्टरले २७ बलको सामना गर्दै १ चौका मद्दतमा १२ रन जोडिन् । बंगलादेशका अन्य ब्याटरले दोहोरो अंकमा रन जोड्न सकेनन् ।
मुर्शिदा खातुन र सोभाना मोस्तार्याले समान समान ७–७ रन जोड्दै पेबिलियन फर्किदा नाहिदा अक्टर ६ रन बनाउँदै आउट भइन् ।
त्यस्तै, रुमाना अहम्मद ४ रनमा आउट हुँदा रितु मोनी ३ रनमा अविजित रहिन् । यता, विकेट किपर शामिमा सुल्ताना मात्र १ रनमा आउट हुँदा मारुफा अक्टर १ रन बनाउँदै नटआउट रहिन् । बंगलादेशले ९ रन अतिरिक्त रुपमा पाएको थियो ।
साविक विजेता अष्ट्रेलियाका लागि जोर्जिया वारेहमले सर्वाधिक ३ विकेट लिँदा दार्सी ब्राउनले २ विकेट लिइन् । त्यस्तै, मेगन सट र एह्स्ली गार्डनरले १–१ विकेट हात पारिन् ।
अष्ट्रेलिया २ खेलमा शतप्रतिशत जित निकाल्दै ४ अंक जोड्दै समूह ‘ए’ को शीर्ष स्थानमा रहेको छ । यता, बंगलादेश भने जारी विश्वकपमा खेलेको २ वटै खेलमा पराजय बेर्होदै शुन्य अंकमा समूह ‘ए’ को चौथौ स्थानमा रहेको छ ।
प्रतियोगिताअन्तर्गत बुधवार २ खेल हुँदैछन् । पहिलो खेलमा वेस्ट इन्डिजले भारतको सामना गर्दा दोस्रो खेलमा पाकिस्तानले आयरल्याण्डसंग प्रतिस्पर्धा गर्नेछ ।
पहिलो खेल नेपाली समय अनुसार पौने ७ बजे सुरु हुँदा दोस्रो खेल राति पौने ११ बजे सुरु हुनेछ ।
लेखक
